“Ssenariləri, bacarıqlı müəllifləri üzə çıxarmaq üçün ən yaxşı üsul müsabiqədir. Bildiyimə görə müsabiqələr də keçirilir, yaxşılar üzə çıxır. Mən eşitdiyimə görə maraqlı ssenarilər də var. Artıq bəzi sahələrdə süni intellektin köməyindən istifadə edilir. Süni intellekt özünü nə qədər məcbur etsə də, axı Azərbaycan filmi üçün ssenari yaza bilməz. Azərbaycanlı düşüncəsini ssenaridə əks etdirə bilməz axı. Süni intellekt göylərdən, kosmosdan material axtarır. O ssenarilərdə azərbaycanlı ruhu olmayacaq. Mən bunun reallaşmasına inanmıram”.
KONKRET.az xəbər verir ki, bunu medianews.az-a açıqlamasında Əməkdar Mədəniyyət işçisi, ssenarist Yusif Şeyxov deyib.
O daha sonra bugünki fəaliyyətindən danışıb.
“Hazırda təqaüddəyəm. Nəsil dəyişməlidir. Məmur deyiləm, o fəaliyyətimə son qoymuşam. Bu işlə daha cavan adamlar məşğuldur. Müasir tələbləri bilən, hiss edən, duyan, yeni texnologiyaları bilən gənclərimiz çoxdur. Bədii proses hər zaman gedir. Bu həmişə belə olub. Bundan gileylənməyi, narazılıq etməyi yersiz sayıram” deyə o bildirib.
“Sehrli xalat” filmində Eldar roluna çəkilən Yusif Şeyxov filmin mövzusunun o dövr üçün aktual olduğunu bildirib:
“Mənə elə gəlir ki, “Sehrli xalat” filmi bu gün çəkilə bilməz. O vaxt bu film Yuri Qaqarinin kosmosa uçmasından 3 il sonra çəkilmişdi. Həmin illərdə bu tip mövzulara maraq çox böyük idi. Uşaqların da ən böyük arzusu kosmonavt olmaq idi. Yadımdadır ki, bir neçə ölkə bu filmi pulla almışdı. Hətta filmin üzə çıxmasından 1 il sonra dünyada 10 milyondan çox tamaşaçı izləmişdi. O vaxt üçün bu çox yaxşı göstərici idi. Bu gün də yeni baxışlar, yanaşmalar var. Bəlkə də kimsə bu haqda düşünür, nə vaxtsa “Sehrli xalat” filmini çəkə bilər? Bunu zaman göstərəcək”.
Yusif Şeyxov daha sonra “Sehrli xalat” filmindəki qəhrəmanlarla ara-sıra görüşdüyünü də bildirib:
“Bir neçə nəfərlə görüşürəm. Efirə bizi birlikdə dəvət edirlər. Hamımız dəstə ilə gedirik. Çəkilişlərdən-çəkilişə görüşürük, xatirələrimizi bölüşürük. Əfsuslar olsun ki, Rəşid rolunun ifaçısı Azər Amerikada dünyasını dəyişdi. Bir oğlu var. Amma əlaqələrimiz yoxdur. Azərin rəhmətə getmə xəbərini facebookda oğlu mənə yazdı”.