Bu, ölkəmizin yeni quruluşun inşasına verdiyi töhfədir – Senat spikeri.
Noyabrın 11-də Astana Klubu siyasi forumunun V yubiley iclası çərçivəsində ekspertlər “Dünya nizam(sızlığ)ı: Gələcəyin tarixini kim yazacaq?” sessiyasının açılışında beynəlxalq siyasətin inkişafındakı əsas problemləri müzakirə ediblər. KONKRET.az-ın Orta Asiya ölkələri üzrə bürosu xəbər verir ki, sessiyada dünyanın aparıcı mütəxəssisləri, siyasətçiləri və diplomatları iştirak ediblər.
“Son dövrlərin ən kəskin qlobal qarşıdurma qovşaqlarının coğrafiyasına baxsanız, görəcəksiniz ki, bunların hamısı Böyük Avrasiyada və ya Böyük Avrasiya ətrafında cəmləşmişdir. Ticarət super müharibələri, iqtisadi sanksiyalar və əks sanksiyalar, davam edən hərbi qarşıdurmalar, geosiyasi qarşıdurmalar, etimad rejiminin və nüvə arsenallarına nəzarət sisteminin məhv edilməsi. Strateji sabitliyin pozulmasından danışarkən, bütün bunları nəzərdə tuturuq. Bu gün isə bu barədə daha çox danışırlar. Bu, birbaşa Böyük Avrasiyaya aiddir”, – deyə Parlament Senatının sədri Dariqa Nazarbayeva salamlama nitqində qeyd edib.
Onun fikrincə, Qazaxıstanın xarici siyasəti səmərəli inteqrasiya, qarşılıqlı faydalı əməkdaşlıq, ortaq tarixi taleyi və ortaq iqtisadi maraqlar əsasında dövlətlərarası birliklər yaratmaq qabiliyyəti ilə fərqlənir: “Əminəm ki, iqtisadi, siyasi, hərbi qarşıdurmanın yeganə mümkün alternativi yalnız qlobal əməkdaşlıqdır. Dürüst, birbaşa və açıq bir dialoq olmadan bu mümkün deyil. Yalnız belə bir dialoq nəticəsində Avrasiya qitəsində və dünyada müasir reallıqları əks etdirən yeni oyun qaydaları meydana çıxa bilər. Bu mənada Astana Klubunun görüşləri və müzakirələri həmişə ən vacib olan açıq söhbətdir. Bu, ölkəmizin töhfəsidir, bu sizinlə, əziz həmkarlarımız, qlobal əməkdaşlıq üçün yeni bir quruluşun inşasında bizim töhfəmizdir”.
Sessiya zamanı tanınmış siyasətçilər və ekspertlər yeni qlobal münaqişələrin təhdidləri, millətçilik, populizm, liberal dünya nizamı, qlobal böhran vəziyyətlərinin həllində milli institutların, beynəlxalq təşkilatların rolunu müzakirə ediblər. Tədbirdə dünyanın 50-dən çox ən tanınmış siyasətçisi, Avrasiyanın tanınmış ziyalıları və beynəlxalq münasibətlər sahəsində ən yaxşı mütəxəssislər iştirak edirlər.
Əsas məruzəçilər arasında Əfqanıstan Prezidenti (2001-2014) Həmid Karzai, Sloveniya Prezidenti (2007-2012) Danilo Türk, Nobel Sülh Mükafatı laureatı (2005), MAQATE-nin Baş Direktoru (2013-2014) Məhəmməd Əl-Baradei, JP Morgan Chase İnternational İdarə Heyətinin sədri Ceykob Frenkel, Rusiya Strateji Araşdırmalar İnstitutunun direktoru, Rusiya Federasiyası Hökumətinin sədri (2004-2007), Rusiya Federasiyası Xarici Kəşfiyyat Xidmətinin direktoru (2007-2016) Mixail Fradkov və başqaları yer alıblar.
İclasın gündəliyində aktual təhlükəsizlik problemləri və Böyük Avrasiyanın strateji gələcəyi var. Beş sessiya çərçivəsində Klub iştirakçıları Avrasiya dövlətlərinin və xalqlarının inkişafındakı ən kəskin problemli meyilləri, regional əməkdaşlığın yeni imkanlarını, habelə gələcəyin konturlarını və ssenarilərini müzakirə edəcəklər.
Konseptual baxımdan, bütün müzakirələr əsas məsələ – Böyük Avrasiyada yeni əməkdaşlıq qurumunun yaradılması ətrafında aparılır.
Klubun təşkilatçıları Qazaxıstan Respublikasının Birinci Prezidentinin Fondu və Fondun nəzdindəki Dünya İqtisadiyyatı və Siyasəti İnstitutudur.