Braziliyanın Federal Ali Məhkəməsi keçmiş prezident Fernando Kolor Di Melunu korrupsiya və çirkli pulların yuyulmasında ittiham edərək 8 il 10 ay həbs cəzasına məhkum edib.

KONKRET.az xəbər verir ki, bu barədə “Globo” telekanalı məlumat yayıb.

Bildirilib ki, məhkəmə ittiham tərəfinin arqumentlərini dəstəkləyib və eks-prezidenti “Petrobras”ın törəmə şirkətlərindən birində korrupsiya sxemində iştirak etməkdə təqsirli bilib.

Məhkəmə sabiq prezidentin 2010-2014-cü illərdə aldığı rüşvətin məbləğinin təxminən 4 milyon dollar təşkil etdiyi qənaətinə gəlib.

Qeyd edək ki, iş üzrə istintaq 2015-ci ildə başlayıb.

Yerli qanunlara görə, səkkiz ildən artıq müddətə azadlıqdan məhrum edilənlər cəzalarını həbsxanada çəkməlidir, onlar ev dustaqlığına buraxıla bilməz.

Yerli mətbuatın yazdığına görə, 1990-1992-ci illərdə hakimiyyətdə olan Kolor di Melu verilən iki apellyasiya şikayətinin sonuna qədər azadlıqda qala bilər.

İqbal Rzayev,

KONKRET.az