Braziliyada tarixi quraqlıq və 102 dərəcədən yuxarı olan rekord yüksək su temperaturu fonunda yüzdən çox delfin ölü tapılıb.

KONKRET.az xəbər verir ki, bu barədə Mamirahua İnstitutu məlumat yayıb.

Məlumata görə, son 7 gündə bütün ölü delfinlər Tefe gölündə aşkar edilib.

İnstitut belə yüksək sayda ölümün qeyri-adi olduğunu bildirib və səbəb kimi Amazonda baş verən tarixi quraqlıq göstərilib.

“Bu ekstremal hadisənin səbəbini müəyyən etmək hələ tezdir, lakin ekspertlərimizin fikrincə, bu, şübhəsiz ki, Tefe gölündəki quraqlıq və yüksək temperatur dövrü ilə əlaqədardır”, – institutun açıqlamasında deyilir.

CNN Brasil xəbər verir ki, tədqiqatçılar və fəallar sağ qalan delfinləri kənardakı laqon və gölməçələrdən suyun daha sərin olduğu əsas çay kanalına apararaq xilas etməyə çalışırlar, lakin ərazinin uzaqlığı səbəbindən əməliyyat çətinləşir.

Səlahiyyətlilər növbəti iki həftə ərzində daha da şiddətli quraqlıq proqnozlaşdırır və bu, delfinlərin daha çox ölümünə səbəb ola bilər.

Ariz Həsənoğlu,

KONKRET.az