Ermənistanın İstintaq Komitəsi əsgər Volodya Qaloyanın Azərbaycanın Qarabağ bölgəsində özünü öldürməsi ilə bağlı yeni məlumat yayıb.

Volodya Qaloyan iyulun 23-ü gecə saat 11 radələrində postda starşinaya avtomatla atəş açıb, ancaq onu öldürə bilməyib və silahını götürərək postdan qaçıb.

Əsgərin meyiti iyulun 24-ü səhər postdan 50 metr aralıda tapılıb. Onun özünü güllələdiyi açıqlanıb.

İyulun 25-də İstintaq Komitəsi əsgərin güllələmək istədiyi starşinanın tutulduğunu bəyan edib. Cinayət işi zorakılıq motivləri ilə araşdırılır. Starşinanın əsgəri zorakılığa məruz qoyaraq özünü öldürmə həddinə çatdırdığı ehtimal olunur.

1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.

Konkret.az