“44 günlük müharibə zamanı Kanadanın “The Globe and Mail” qəzetinə müsahibə verən Nikol Paşinyan Ərdoğanı Birinci Dünya Müharibəsi zamanı qırğınlar və deportasiyalar yolu ilə erməni əhalisini məhv edən Osmanlı İmperiyasını bərpa etmək arzusunda olan lider kimi xarakterizə etmişdi: “Yüz il keçib və Türkiyə erməni soyqırımını davam etdirmək üçün Cənubi Qafqaza qayıdıb”.
Məğlubiyyətdən sonra Nikol Paşinyanın mövqeyi dəyişib. Dünəndən internetdə Paşinyan-Ərdoğan görüşünün görüntüləri müzakirə olunur, burada Paşinyan çox xoşbəxt görünür, böyük təbəssümlə, əlində Ərdoğanın kitabını tutur.
KONKRET.az xəbər verir ki, bu fikirləri separatçı “Ardarutyun” partiyasının həmtəsisçisi Akop Akopyan bildirib.
Onun sözlərinə görə, Paşinyan üçün əsas məsələ Ərdoğanla görüşmək idi:
“Son 30 ildə Türkiyə Ermənistanla münasibətlərini dayandırmışdı. Bu gün Ermənistan hakimiyyətinin fikrincə, artıq Qarabağ münaqişəsi yoxdur, Paşinyan Qarabağı Azərbaycanın bir hissəsi kimi tanıyıb və artıq həmin görüşlərə mane olacaq heç bir maneə yoxdur. Paşinyan üçün əsas o idi ki, Ərdoğanla görüşüb və bu o deməkdir ki, hər şey onların planlaşdırdıqları kimi gedir. Nəticə isə belədir: Qarabağ məsələsi artıq bağlanıb. Növbəti addımlar da bunu isbatlamalıdır.
Anna Akopyan isə Ərdoğanın həyat yoldaşı ilə əylənir, o, Əliyevə erməni əsirlərin müqabilində xəritələr almağı, onları hissə-hissə təhvil verməyi məsləhət görür.
Müşahidələrə görə, Ərdoğan Ermənistan-Türkiyə münasibətlərinin tənzimlənməsini Ermənistan-Azərbaycan münasibətlərinin tənzimlənməsi ilə şərtləndirməkdə davam edir, üstəlik qeyd edir ki, Zəngəzur dəhlizi həyata keçirilməyənə qədər Ermənistan-Türkiyə münaqişəsinin nizamlanmasından söhbət gedə bilməz.
Əgər bu gün Türkiyə və Azərbaycanın tələbləri yerinə yetirilmirsə, bu, an məsələsidir. Bu səlahiyyətlilər vəzifələrində davam etsələr, gec-tez bu tələblər də yerinə yetiriləcək. Biz uduzan psixologiyaya sahibik. 2020-ci ildə ədalətli tələb yarananda ki, məğlub olan lider istefa versin və hakimiyyəti yeni hökumətə təhvil versin, bunu nəzərdə tuturduq. Budur, məğlub olanın psixologiyası, daha heç bir iradə göstərə bilməyəcək, heç bir münasibət göstərə bilməyəcək, çünki o, onu məğlub edən dövlət başçılarının qarşısına qoyduğu bütün tələbləri yerinə yetirməlidir. Məğlub olan hakimiyyət ölkəni idarə etdikcə, bir sıra güzəştlərin və yeni məğlubiyyətlərin şahidi olacağıq. Lakin tarixi ədalət gec-tez bərpa olunacaq. Əliyevə elə gəlir ki, onun üçün hər şey mümkündür, amma tarixi ədalət pozulub. Bütöv bir xalq güc təhdidi altında öz vətənindən didərgin düşüb”.
Akop Akopyanın sözlərinə görə, Nikol Paşinyan Ermənistan üçün yalnız bir şey edə bilər: bir gün əvvəl istefa vermək.
Akop Akopyan qeyd edib ki, Ermənistan hakimiyyətinin arzusu ləyaqətlə yaşamaq deyil, öz güclərini saxlamaqdır. “Bu gün məğlub olan hakimiyyətin öz hakimiyyətini saxlamaq üçün yeganə şansı qonşu dövlətlərə və ya düşmən dövlətlərə qeyd-şərtsiz sülhə getmək prinsipini təklif etməkdir, yəni onlar hər şeyin bahasına sülh müqaviləsi imzalamağa hazırdırlar.
Natiq Səlim,
KONKRET.az