Son vaxtlar mobil istifadəçilərin ən çox qarşılaşdığı problemlərdən biri də səhvən fərqli nömrələrə balans köçürülməsidir. Belə hallarda insanlar ödədikləri məbləğin geri qaytarılıb-qaytarılmaması ilə maraqlanırlar.

Mövzuya dair KONKRET.az-a danışan informasiya təhlükəsizliyi eksperti Elvin Abbasov bildirib ki, ödəniş edildiyi andan etibarən məbləğ mobil operatorun sistemində kontura çevrilir və artıq xidmət valyutası kimi qəbul olunur:

“Balans kimi yüklənən vəsait şəbəkə resurslarının istifadəsinə yönəldiyi üçün onun geri, nağd şəkildə qaytarılması nə hüquqi, nə də texniki baxımdan mümkündür. Əks halda fırıldaqçılıq və sui-istifadə hallarının sayı ciddi şəkildə arta bilər”, – deyə ekspert vurğulayıb.

Onun sözlərinə görə, operatorlar yalnız istisna hallarda – yəni balans səhv nömrəyə yüklənibsə və həmin kontur xərclənməyibsə, dəstək xidməti vasitəsilə müdaxilə edə bilirlər. Ümumilikdə isə mövcud qaydalara əsasən kontur ödənişdən sonra pul kimi geri qaytarılmır.

Aynurə İsmayıl
KONKRET.az