Binəqədi Rayon Məhkəməsində qəsdən sağlamlığa yüngül zərər vurmada təqsirləndirilən Xəlil Əkbərovun (adı, soyadı şərtidir) cinayət işi üzrə məhkəmə istintaqı yekunlaşıb.

KONKRET.az pravdaaz-a istinadən xəbər verir ki, hakim Aynurə Sadıqovanın sədrliyi ilə keçirilən prosesdə hökm oxunub.

Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında 19 dekabr 2025-ci il tarixli Milli Məclisin Qərarı tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və onun barəsində olan cinayət təqibinə xitam verilib.

İbtidai istintaq orqanının irəli sürdüyü ittihama əsasən, hadisə 23 may 2025-ci il tarixdə saat 20 radələrində paytaxtın Binəqədi rayonu ərazisində baş verib.

Belə ki, təqsirləndirilən şəxs orta dərəcəli alkoqol sərxoşluğu vəziyyətində kirayədə yaşadığı fərdi yaşayış evinin həyətində olarkən həmin evin sahibi ilə qeyri-rəsmi nikah münasibətlərində olan şəxslə birlikdə olub. Həmin vaxt Xəlil Əkbərov ev sahibinin qeyri-rəsmi nikah münasibətlərində olduğu şəxslə kobud danışmasına irad bildirib. Bu məsələ tərəflər arasında mübahisənin yaranmasına səbəb olub.

Mübahisə zamanı təqsirləndirilən şəxs zərərçəkmiş Darvin Dadaşova (adı, soyadı şərtidir) qarşı zor tətbiq edib. O, butulkanın şüşə hissəsi ilə zərərçəkmişin baş nahiyəsinə qəsdən zərbə vurub.

Zərbələr nəticəsində Darvin Dadaşova müxtəlif xəsarətlər yetirilib.

Ekspertiza həmin xəsarətlərin ümumilikdə zərərçəkmiş şəxsin sağlamlığının qısa müddətə pozulmasına səbəb olduğunu və dərəcəsinə görə sağlamlığa yüngül zərər vurmaya aid edildiyini müəyyənləşdirib.

Beləliklə, ibtidai istintaq orqanı hesab edib ki, təqsirləndirilən şəxs mübahisə zamanı Darvin Dadaşovun sağlamlığına qəsdən yüngül zərər vurub.