Gedən saqqallı adamın heykəli 2000 ildən çox əvvəl Ptolemeylər sülaləsi dövründə qara bazaltdan hazırlanıb.

KONKRET.az xəbər verir ki, ABŞ-nin Ohayo ştatındakı Klivlend İncəsənət Muzeyi İkinci Dünya Müharibəsi zamanı Britaniya işğalı zamanı oğurlanmış heykəli Liviyaya qaytaracaq.

Nümunəni 1991-ci ildən saxlayan muzey çərşənbə günü onu geri qaytaracağını elan edib.

“Əski Əsərlər Departamentinin təqdim etdiyi məlumatlara və yeni araşdırmalara əsasən, muzey könüllü olaraq heykəli Liviya mülkü kimi tanıyır”, – muzeyin bəyanatında deyilir.

Heykəl demək olar ki, iki fut hündürlükdədir (təxminən 61 sm) və bazaltdan hazırlanıb.

Heykəlcik 1937-1938-ci illərdə Liviyanın şərqində olan qədim Ptolemeylər ərazisində sütunlu sarayın qazıntıları zamanı böyük bir qabda tapılıb.

Daha sonra heykəlcik Liviyada Britaniyanın işğalı zamanı dağıdılmış Ptolemais Muzeyindən götürülüb. İtaliyalı bir alimin 1950-ci il nəşrində heykəlin ehtimal ki, 1941-ci ildə itdiyi ifadə edilib.

1960-cı ildə heykəlcik Luzernə gətirilib. 1966-cı ildən 1991-ci ilə qədər Nyu-York sənət kolleksiyaçıları Lourens və Barbara Flayşmanın şəxsi kolleksiyasında saxlanılıb və 1991-ci ildə muzeyə hədiyyə edilib.

Rəsmiyyə Şərifova,

KONKRET.az