ABŞ-nin Azərbaycana qarşı qərəzli mövqeyi davam edir. Bu dəfə Dövlət Departamentinin Azərbaycanı dini etiqad azadlığını ciddi şəkildə pozan ölkələrin siyahısına daxil etməsi Vaşinqtonun Bakıya qarşı növbəti hücumudur. Azərbaycanda təmsil olunan bütün dini icmaların rəhbərləri və nümayəndələri ABŞ-nin bu siyasətindən narahatlıqlarını ifadə ediblər.
KONKRET.az xəbər verir ki, israilli politoloq və jurnalist Roman Qureviç bildirib ki, Azərbaycan postsovet məkanında multikulturalizm və tolerantlıq modelidir:
“Avropadan nümayəndə heyətini Bakıya necə gətirdiyimi xatırlayıram. Milad gecəsi idi və onlar Bakının küçələrində avropalılara yaxın bayram atributları ilə bəzədilmiş çoxlu sayda yeni il ağacı, Milad suvenirləri və oyuncaqlar gördülər, təəccüblərini gizlətmədilər. Onların çaşqınlığının səbəbini soruşdum. Avropalı qonaqlarım “Azərbaycan müsəlman ölkəsidir və insanlar Yeni ili küçələrdə qeyd edirlər?” deyə soruşdular. Sonra izah etdim ki, Azərbaycanda əhalinin bütün etnik və dini qruplarının mədəniyyətinə, adət-ənənələrinə hörmətlə yanaşılır, bayramları da doğma bayram kimi kök salıb. Mən Bakıda doğulub boya-başa çatmışam və yaxşı xatırlayıram ki, biz bayramları birlikdə necə qeyd edirdik. Məsələn, Novruz bayramında mənzillərə şirniyyat və səməni olan boşqablar paylanır, Pasxa bayramında yumurtalar rənglənir, Hanukkada isə hər şey şamlarla bəzədilirdi. Azərbaycan insanların həm öz, həm də başqa xalqların dinlərinə hörmət etdiyi nadir yerdir. Məsələn, Bakının mərkəzində erməni kilsəsi hələ də toxunulmaz vəziyyətdədir. Orada katolik və pravoslav kilsələri də var. Ölkədə rus, yəhudi və erməni icması mövcuddur. Yeri gəlmişkən, Azərbaycanda 30 mindən çox erməni yaşayır. Deməli, Azərbaycana qarşı dini dözümsüzlük ittihamlarını heç cür başa düşmək olmaz, bu, növbəti yalan və ən iyrənc böhtandır.
Yeri gəlmişkən, ABŞ Dövlət Departamenti nədənsə Ermənistanı unudur. Baxın, Ermənistanda bir nəfər də olsun azərbaycanlı yoxdur. Orada yeganə sinaqoq üç dəfə yandırılıb və bu il yanvarın 1-də İrəvanda neonasist parad keçirilib. Amma nədənsə Ermənistan ABŞ-nin qara siyahısına salınmayıb. Ona görə də hesab edirəm ki, belə bir siyahının tərtibi qeyri-peşəkar şəkildə, kiminsə maraqları naminə, lobbiçilər tərəfindən diqtə edilib. Bunu həqiqətin və aşkar faktların kobud şəkildə təhrifindən başqa bir şey adlandırmaq olmaz”, – deyə R.Qureviç bildirib.
Rusiya Federasiyası Dövlət Dumasının keçmiş deputatı, professor Aleksandr Osovtsev isə Azərbaycanla bağlı qərəzli bəyanatı anlamadığını bildirib: “Birləşmiş Ştatlar İsrailin müttəfiqidir, lakin amerikalıların Azərbaycanla bağlı açıqlamalarına təəccüblənirəm. Azərbaycanda indiyədək heç kimin dinlə bağlı problemi olmayıb. Əgər bu, qarşıdan gələn seçkilərdə erməni diasporunun səsini cəlb etmək üçün uydurulmuş populist yanaşmadırsa, olduqca yanlış siyasətdir. Dövlət Departamentinin bu qərarı tamamilə ədalətsizdir. Ona görə Azərbaycanın adının bu siyahıya salınması məni çaşdırıb”.
Qafqaz və Yaxın Şərq üzrə mütəxəssis, Yerusəlimdəki Şərq Tərəfdaşlığı İnstitutunun direktoru Abraham Şmuleviç isə bildirib ki, dini etiqad azadlığı və insan haqları məsələsi çox vaxt siyasi oyunun elementi kimi istifadə olunur: “Azərbaycandakı vəziyyətə gəlincə, mən bir ravvin və dünyadakı yəhudi diasporları ilə əlaqə saxlayan bir şəxs kimi əminliklə deyə bilərəm ki, Azərbaycanda yerli yəhudi icmasının heç bir problemi yoxdur. Bu ölkədə əla pravoslav, katolik xristianların və digər dini konfessiyaların icması var. Azərbaycan ərazisində yaşayan ermənilərin də dini etiqad azadlığı ilə bağlı heç bir problemi yoxdur. Azərbaycanda başqa dini konfessiya və ya cərəyanlardan çoxlu tanışlarım var. Məsələn, mən yəhudiliyi qəbul etmiş çoxlu müsəlman və ya rus tanıyıram, lakin onlardan heç vaxt hər hansı təzyiqlə bağlı şikayət eşitməmişəm”.
Vəli Həsənov,
KONKRET.az