“Bu hakimiyyət belə bir fikir yaradır ki, “Artsax”ın təslim olmasının alternativi yoxdur, bəs biz Qarabağı otuz il necə saxladıq? Bəli, keçmişdə çoxlu səhvlər olub, amma biz 30 il ərzində düzgün diplomatiya aparmışıq, Rusiya ilə yaxın münasibətlərimiz olub, Qərblə heç də az konstruktiv olmayan münasibətlərimiz olub, iki istiqamətdə düzgün siyasət apara bilmişik, indi isə xarici siyasətimiz yoxdur”.

KONKRET.az xəbər verir ki, bu fikirləri “Suallarım var” verilişində Stenford Universitetinin siyasi elmlər doktoru Artur Xaçikyan deyib.

“Serbiya artıq bir neçə ildir ki, Qərbin vəsvəsəsinə və təzyiqinə tab gətirmir, amma Kosovonu tanımır. Niyə Serb xalqı bunu edə bilər, amma biz, bu hakimiyyətdəkilərə görə, edə bilmirik? Kosovo Qərbin ikili standartlarının nümunəsidir. Serbiya rusiyapərəst dövlət olduğundan Qərb hesab edirdi ki, güc tətbiq etsinlər, qoşun yeritsinlər, serbləri cəzalandırsınlar, bəyan etsinlər ki, etnik təmizləməyə dözməyəcəklər. Kosovo məsələsində Qərb “qurtuluş naminə ayrılma” düsturunu təklif edib, bizdə isə “Artsax”ı təhdid edən soyqırımı görməzlikdən gəlir”, – deyə Artur Xaçikyan bildirib.

O vurğulayıb ki, Qərbin ikiüzlülüyünün həddi yoxdur: Rusiyaya qarşı saysız-hesabsız sanksiyalar tətbiq edilib, Əliyevi isə hətta açıq təhdidlərə görə qınamırlar. Qərb Ermənistana müşahidəçi göndərir, onlar da burada yalnız vaxt keçirmək və Əliyevə buradan hesabat vermək üçün gəlirlər. Rusiya Qərbin dediyi kimi SSRİ-ni bərpa etməyə çalışanda dərhal bəyan edirlər ki, buna imkan verməyəcəklər, Türkiyə ört-basdır edilməmiş imperiya siyasəti aparanda isə Türkiyəyə sualları qalmır.

“Heç bir dövlət liberal dəyərlərdən, insan haqlarından, demokratiyadan bu qədər ucadan danışmır və sonra bütöv bir xalqı – 120 min insanı soyqırıma məhkum edir. Bu iyrəncdir”, – Xaçikyan bildirib.

“Avropa Şurasının rəhbəri açıq şəkildə dedi ki, ermənilərin heç bir hüququ yoxdur, otuz illik danışıqlar prosesi dəyərsizdir, Haaqa məhkəməsinin qərarı heç bir məna kəsb etmir, Əliyevin birbaşa təhdidlərinə cavab verilmir, beynəlxalq normalar bizə aidiyyatı yoxdur”, – deyə Xaçikyan vurğulayıb.

Onun sözlərinə görə, Ermənistan rəhbərliyinin bütün hərəkətləri Qərbin, Azərbaycanın və Türkiyənin maraqlarına xidmət edir.

“Niyə beş il əvvəl hakimiyyətə gəldiniz, əgər Ermənistanın kadastr şəhadətnaməsi olmadığını düşünürdünüzsə. Bu adamlar müharibəni, özlərinin elan etdikləri sülh dövrünü, danışıqları, korrupsiyaya qarşı mübarizəni iflasa uğratdılar, demokratik ölkə qura bilmədilər – demokratik ölkədə məmur vətəndaşın üzünə tüpürməz, ölən hərbçilərin valideynlərinə belə qəddar münasibət göstərməz”, – deyə o bildirib.

Erməni alim vurğulayıb ki, son 105 ildə erməni xalqı belə ağır vəziyyətdə olmayıb.

“Bu gülünc tezis – “yaxşı yaşamaq üçün “Artsax”ı təslim edəcəyik” – tamamilə yalandır, çünki Azərbaycan bəyan edir ki, Ermənistan süni dövlətdir, ermənilərin dövləti olmamalıdır, yüz minlərlə azərbaycanlı Ermənistana qayıtmalıdır. Zəngəzur dəhlizindən danışırlar. Əliyev ermənilərə nifrət edir. Ermənistanın baş nazirinin Əliyevi guya eşitməmiş kimi göstərməsinin səbəbi bəlli deyil. Cəmiyyətimizin davranışı da anlaşılmazdır. Xalqımız sanki narkotikin təsiri altındadır”, – deyə Artur Xaçikyan qeyd edib.

Sevinc Paşayeva,

KONKRET.az