Rusiya Prezidenti Vladimir Putin Rusiya vətəndaşlığının və yaşayış icazələrinin verilməsi üçün yeni, müvəqqəti prosedurun tətbiqinə dair fərman imzalayıb.

KONKRET.az Globalinfo.az-a istinadla xəbər verir ki, bu barədə sənəd artıq hüquqi aktların rəsmi dərc portalında yerləşdirilib.

Yeni qaydalara əsasən, fərman xüsusi hərbi əməliyyatda (SMO) iştirak edən əcnəbiləri və vətəndaşlığı olmayan şəxsləri əhatə edir. Belə şəxslərə Rusiya vətəndaşlığı almaq imkanı yaradılacaq.

Sənədə görə, xarici vətəndaşlar pasport almaq üçün Rusiya Silahlı Qüvvələrindən buraxılış əmri və ya komissiyanın qərarı barədə çıxarış təqdim etməlidirlər. Bununla belə, bu tələblər Belarus vətəndaşlarına şamil edilmir.

Xatırladaq ki, bu ilin iyul ayında Putin Rusiya vətəndaşlığının ləğv olunması üçün əsasların siyahısını xeyli genişləndirən qanun imzalamışdı.

Yeni qanuna əsasən, cinsi zorakılıq, terrorizmə çağırış, Rusiyanın təhlükəsizliyinə zərər vuran xarici təşkilatlarla əməkdaşlıq, beynəlxalq qərarların həyata keçirilməsinə yardım və düşmən ölkələrə dəstək kimi hallar artıq vətəndaşlığın ləğvinə səbəb ola bilər.