Gürcüstanın baş naziri İrakli Qaribaşvili Çinin Tbilisidəki səfiri Çjou Tszyanla görüşdə prezident Salome Zurabişvilinin Çin Xalq Respublikasının sədri Si Cinpinlə bağlı söylədiyi sözlərdən təəssüfləndiyini bildirib.

KONKRET.az xəbər verir ki, bu barədə Gürcüstan hökumətinin mətbuat xidməti məlumat yayıb.

Dövlət başçısı Zurabişvili Fransanın LCI telekanalına müsahibəsində bildirib ki, əgər Rusiya liderləri Vladimir Putin və Çinin liderləri Si Cinpin nə vaxtsa məhkum olunsalar, bu, tarixi nəticə olacaq. Prezident qeyd edib ki, o, bunu real hesab etmir. Gürcüstan hökumətinin bəyanatında qeyd olunur ki, baş nazir prezidentin sözlərindən təəssüfləndiyini bildirib və bu bəyanatın ölkələr arasında münasibətlərin müsbət tarixi dinamikasına təsir etməyəcəyinə ümid etdiyini bildirib.

Həmçinin səfirlə görüşdə Qaribaşvili prezidentin bəyanatının “qəti şəkildə qəbuledilməz və hədsiz” olduğunu vurğulayıb. O, bu cür ritorikanın Gürcüstan hökumətinin mövqeyinə zidd olduğunu vurğulayıb. Baş nazir bildirib ki, ölkənin hazırkı prezidenti ilk dəfə deyil ki, konstitusiyaya zidd və dövlətin maraqlarına xələl gətirən fəaliyyət göstərir. O xatırladıb ki, impiçment proseduruna səbəb Zurabişvilinin konstitusiyanı pozması olub.

Xatırladaq ki, oktyabrda Gürcüstanın Konstitusiya Məhkəməsi prezident Salome Zurabişvilinin impiçmenti işi üzrə qərar qəbul edib. Səbəb xaricə səyahətləri tənzimləyən qanunun pozulması olub. Zurabişvili hökumətin icazəsi olmadan xaricə gedib. Gürcüstan konstitusiyasına görə, xarici siyasəti ancaq icra hakimiyyətləri müəyyən edə bilər.

Rəsmiyyə Şərifova,

KONKRET.az