Azərbaycanda bəzi vətəndaşların əvvəlki kredit ödənişlərində gecikmələr səbəbindən yeni kredit ala bilməməsi geniş müzakirə olunan məsələlərdəndir. Xüsusilə, kredit tarixçəsində mənfi qeydlər olan şəxslərin banklar tərəfindən rədd cavabı alması narazılıqlara səbəb olur.

Bəs, bu cür imtinalar qanunvericilik baxımından nə dərəcədə əsaslıdır?

Mövzu ilə bağlı KONKRET.az-a açıqlama verən Azərbaycan Qiymətləndiricilər Cəmiyyətinin Hüquq departamentinin müdiri, vəkil Fuad Xəzani oğlu Məmmədov bildirib ki,

“Kredit büroları haqqında” Qanunun 10.1-ci maddəsinə əsasən, kredit tarixçəsini təşkil edən məlumatlarda edilmiş son dəyişiklikdən sonra həmin məlumatlar 10 il müddətində saxlanılır.

“Bu müddət başa çatdıqdan sonra məlumatlar məhv edilir və ya kredit tarixçəsi subyektinin razılığı ilə arxivləşdirilə bilər.

Əvvəlki kredit ödənişlərində gecikmə və ya problem olması bankın qərarına birbaşa təsir göstərən əsas amillərdən biridir. Lakin bu hal qanunvericilik baxımından kredit verilməsini qadağan edən norma kimi nəzərdə tutulmayıb.

Qanun banklara və ya bank olmayan kredit təşkilatlarına gecikməsi olan şəxslərə kredit verməyi qadağan etmir. Kreditin verilib-verilməməsi hər bir bankın və ya kredit təşkilatının daxili qaydalarına və risk qiymətləndirməsinə əsasən müəyyən edilir”, – deyə vəkil qeyd edib.

Beləliklə, Azərbaycan qanunvericiliyinə görə, bankların kredit verməkdən imtina etməsi əsasən müştərinin kredit tarixçəsi, maliyyə vəziyyəti və ödəmə qabiliyyəti ilə bağlı risklərin yüksək qiymətləndirildiyi hallarda qanuni sayılır. Bu qərar isə bankların müstəqil kommersiya fəaliyyəti çərçivəsində qəbul edilir.

Aynurə İsmayıl
KONKRET.az