İrəvanda Paşinyan əleyhdarlarının keçirdiyi aksiyalar davam edir. Kilsənin təşviqi ilə keçirilən mitinqlər son 2 gündə daha genişmiqyaslı xarakter almağa başlayıb. Etirazçıların başında isə Tavuş arxiyepiskopu Baqrat Qalstanyan dayanır.
O, dünənki mitinqlər zamanı baş nazir Nikol Paşinyana istefa verməsi üçün 1 saat vaxt vermişdi. Ümumilikdə isə Ermənistanda və xaricdəki erməni diasporunda arxiyepiskopun bu təşəbbüsunə yetərincə dəstək var.
Bəs mitinqlərin əsas təşkilatçısı Baqrat Qalstanyan əslində kimdir?
KONKRET.az son günlər Nikol Paşinyanla kəllə-kəlləyə gələn erməni arxiyepiskopun bioqrafiyasını təqdim edir:
Baqrat Qalstanyan 20 may 1971-ci ildə Ermənistanın Gümrü şəhərində anadan olub. Ermənistanda “Müqəddəs Eçmiədzin Ana taxt-tacının Qevorqyan” seminariyasında təhsilini davam etdirən Qalstanyan 1993-cü ildə deakon dini təyinatını alıb. 1995-ci ildə Eçmiədzindəki Müqəddəs Qriqori məktəbinin direktoru vəzifəsini icra edərkən, yeni yaradılmış Xristian Təhsili və Təbliğ Mərkəzinin vitse-prezidenti təyin edilib. O, “Qanteq” dini televiziya proqramının qurucu üzvlərindən biri olub. Baqrat Qalstanyan 1996-1998-ci illərdə I Qareqinin katibi olaraq Cənubi Amerika, Rusiya, Böyük Britaniya və Avstriyaya papalıq səfərlərində iştirak edib.
Kanada Yeparxiyasının Baş Assambleyası 2003-cü ilin may ayında Qalstanyanı Kanada Erməni Kilsəsinin Yeparxiyasının primatı seçib və həmin ilin 22 iyununda II Qareqin onu Yepiskop rütbəsinə yüksəldib. 6 yanvar 2013-cü ildə Kanadanın Monreal şəhərində Qalstanyana Kraliça II Yelizavetanın “Almaz yubiley” medalı təqdim olunub. Arxiyepiskop Baqrat Qalstanyan 2015-ci ildən bəri Erməni Apostol Kilsəsinin Tavuş yeparxiyasının primatı dini vəzifəsini yerinə yetirir.
Qeyd edək ki, arxiyepiskop Baqrat Qalstanyan bütün fəaliyyəti boyunca millətçi mövqeyi və qatı türk əleyhidarlığı ilə tanınıb. (Yenisabah.az)