Avropada elektromobil istehsalına keçid 600 min iş yerinin itirilməsinə səbəb olacaq.

KONKRET.az xəbər verir ki, bu barədə Aİ-nin daxili bazar üzrə komissarı Tyerri Breton “Corriere della Sera” qəzetinə müsahibəsində deyib:

“Avropa avtomobil sektorunda 12,7 milyon insan çalışır ki, bu da Aİ-də bütün məşğulluğun 6,6%-ni təşkil edir. Elektromobillərə keçid Aİ-də 600 min iş yerinin itirilməsinə səbəb olacaq”.

Breton elektrik enerjisi istehsalçılarından ibarət xüsusi komitənin yaradılması planlarından da danışıb:

“2030-cu ilə qədər bizə 6,8 milyon enerji doldurma məntəqəsi lazım olacaq. Hazırda 350 min məntəqə var, onların da 70%-i Fransa, Almaniya və Hollandiyadadır“.

O hesab edir ki, elektromobillərə effektiv keçidi həyata keçirmək üçün 2026-cı ilə qədər xüsusi fond yaratmaq lazımdır.

Onun hesablamalarına görə, 2050-ci ilə qədər istifadədə olan avtomobillərin 20%-i daxili yanma mühərrikləri ilə işləyəcək.

Noyabrın 9-da o, avtomobil emissiyaları üçün ekoloji tələbləri sərtləşdirmək və havanın keyfiyyətini yaxşılaşdırmaq üçün Avro 7 tənzimləməsini təklif etmək niyyətindədir.

İqbal Rzayev,

KONKRET.az