Böyük Britaniyanın müdafiə naziri Ben Uolles  payızda kadr dəyişikliyi zamanı vəzifəsini tərk etməyi düşünür.

KONKRET.az xarici KİV-ə istinadən xəbər verir ki, bu vəzifəni maliyyə nazirinin müavini Con Qlen, daxili işlər nazirinin müavini Tom Tugendhat və ya xarici işlər nazirinin müavini En-Mari Trevelyan tuta bilər.

Qeyd olunub ki, Uolles keçmiş baş nazir Boris Consonun yaxın adamı olub və hazırda Rişi Sunak hökumətini dəstəkləyir.

Məlumata görə, qərar Mühafizəkarlar Partiyasındakı problemlərlə bağlı deyil.

“Bu dəyişikliklər gələcəklə bağlıdır və Rişi Sunak seçkidən əvvəl ictimaiyyətə daha yeni bir komanda təqdim edir”, – “The Times” qəzeti yazıb.

Qeyd edək ki, 53 yaşlı Ben Uolles mühafizəkarlar arasında populyar olmasına baxmayaraq, baş nazirliyə namizədliyini irəli sürmədi. Əvvəlcə o, Liz Trassı dəstəklədi, daha sonra isə Boris Consonun yenidən seçilməsini müdafiə etdi. Rişi Sunak Baş nazir seçildikdən sonra rəqiblərini dəstəkləməsinə baxmayaraq, onu vəzifəsindən uzaqlaşdırmadı.

Ben Uolles NATO-nun baş katibi postuna da iddialı idi, lakin Alyans ölkələri hazırkı lider Yens Stoltenberqin səlahiyyətlərini bir il müddətinə uzatmağa qərar verdilər.

İqbal Rzayev,

KONKRET.az