Çinin süni intellekt sahəsində sürətlə irəliləməsi təkcə texnologiya şirkətlərini deyil, dünyanın müxtəlif ölkələrində çalışan çinli alim və mühəndisləri də vətənə qayıtmağa həvəsləndirir. Xüsusilə ABŞ və Avropanın aparıcı universitetlərində, eləcə də texnologiya şirkətlərində çalışan yüksək ixtisaslı mütəxəssislər son illərdə Çinə dönərək ölkənin texnoloji inkişafına töhfə verməyə başlayıblar.

KONKRET.az xəbər verir ki, mütəxəssislərin fikrincə, bu tendensiyanın əsas səbəbləri arasında Çində süni intellekt sahəsinə ayrılan böyük dövlət investisiyaları, elmi tədqiqatlar üçün yaradılan əlverişli şərait, yüksək maaşlar və geniş karyera imkanları dayanır. Bundan əlavə, açıq mənbəli süni intellekt modellərinin inkişafı və innovasiya ekosisteminin sürətlə genişlənməsi də ölkəyə dönüşü sürətləndirən amillərdəndir.

Şanxayda keçirilən 2026 Dünya Süni İntellekt Konfransı (WAIC) Çinin bu sahədəki iddialarını bir daha nümayiş etdirdi. Konfransda insanabənzər robotlar, yeni nəsil süni intellekt çipləri və sənaye həlləri təqdim olunaraq Çinin laboratoriya səviyyəsindəki tədqiqatlardan kütləvi istehsala keçidi diqqət mərkəzində saxlanıldı.

Ekspertlər hesab edirlər ki, Çin artıq yalnız yeni süni intellekt modelləri hazırlamaqla kifayətlənmir. Ölkə bu texnologiyaları istehsal, logistika, səhiyyə, nəqliyyat və robototexnika kimi sahələrə inteqrasiya edərək qlobal rəqabətdə üstünlük qazanmağa çalışır. Bu strategiya xaricdə çalışan çinli mütəxəssislər üçün də cəlbedici perspektivlər yaradır və onların ölkəyə qayıdışını sürətləndirir.

Natiq Səlim,
KONKRET.az