2019-cu ildə yanğından sonra “Notr–Dam Katedralı”nın bərpasına nəzarət edən Fransa ordusu generalı Jan-Lui Corclen ölkənin cənubundakı Pireney dağlarında yıxılaraq ölüb.

KONKRET.az xarici KİV-ə istinadən xəbər verir ki, 74 yaşlı general Pireney dağlarında, 2650 m yüksəklikdə yerləşən Fosten aşırımının yaxınlığında dünyasını dəyişib.

Qeyd olunub ki, avqustun 30-da onun 75 yaşı tamam olmalı idi.

Məlumata görə, Jan-Lui Corclen 1967-ci ildə Sen-Sir Ali Hərbi Məktəbini bitirib və kapitan rütbəsi ilə Fransa Silahlı Qüvvələrinin Baş Qərargahına daxil olub. 2006-cı ildə o, Fransanın Baş Qərargah rəisi təyin edilib. 2010-2016-cı illərdə Fəxri Legion Ordeninin Böyük Kansleri vəzifəsində çalışıb. 2019-cu ilin aprelində “Notr–Dam–de-Pari”də (Notr-Dam Katedrali) baş vermiş güclü yanğından sonra o, bu tarix və mədəniyyət abidəsinin bərpası layihəsini həyata keçirmək üçün respublika Prezidentinin xüsusi nümayəndəsi təyin edilib.

İqbal Rzayev,

KONKRET.az