İranda keçən il ən azı 582 nəfər edam edilib.

KONKRET.az xarici mediaya istinadən xəbər verir ki, insan haqları təşkilatlarının hesabatına əsasən bu, 2015-ci ildən bəri ən yüksək göstəricidir.

Bildirilib ki, hüquq müdafiəçilərinin 333 edam faktını qeydə aldığı 2021-ci illə müqayisədə artım 75% təşkil edib.

Məlumata görə, edam edilənlərin yarısından çoxu narkotiklə əlaqəli, 49%-i isə qətl ittihamı ilə ölüm cəzasına məhkum edilib.

İranın İnsan Haqları təşkilatının direktoru Mahmud Əmiri-Müqəddam bildirib ki, ittihamlardan asılı olmayaraq hər bir edam siyasi xarakter daşıyır.

Onun sözlərinə görə, hökumət xalq arasında qorxu yaratmaq üçün qeyri-siyasi ittihamlarla edamların sayını artırıb.

Hesabatın tərtibçiləri ölüm hökmlərinin elan edilməsində şəffaflığın olmamasına diqqət çəkiblər. Onlar bəyan edib ki, bütün edamların 88%-dən çoxu rəsmi orqanlar tərəfindən ictimaiyyətə açıqlanmayıb.

İqbal Rzayev,

KONKRET.az