Dəridə yaranan xırda qırmızı nöqtələr, xalq arasında “qırmızı xal” adlandırılan törəmələr əksər hallarda sağlamlıq üçün təhlükə yaratmır. Lakin onların qəfil dəyişməsi və ya çox sayda meydana çıxması dermatoloqa müraciət üçün səbəb ola bilər.

KONKRET.az xəbər verir ki, dermatoloq Alyona Zazulinskayanın sözlərinə görə, bu cür qırmızı nöqtələrin əksəriyyəti “albalı angioması” adlanan xoşxassəli damar törəmələridir. Onlar kiçik qan damarlarının lokal şəkildə çoxalması nəticəsində yaranır.

Mütəxəssis qeyd edib ki, angiomanın dəqiq yaranma səbəbi tam məlum deyil. Bununla belə, yaşla bağlı damar dəyişiklikləri, irsi meyllilik, hormonal dəyişikliklər, uzun müddət günəş şüalarının təsirində qalmaq, dərinin təbii qocalması və xırda travmalar onların yaranmasına təsir göstərə bilər.

Angiomalar daha çox 30-40 yaşdan sonra meydana çıxır və 50-60 yaşlarda onların sayı arta bilər. Tipik görünüşlü, kiçik ölçülü, eyni rəngdə olan, ağrı və qaşınmaya səbəb olmayan, böyüməyən və səbəbsiz qanamayan angiomalara adətən tibbi müdaxilə tələb olunmur.

Hansı hallarda həkimə müraciət etmək lazımdır?

Mütəxəssis bəzi dəyişikliklərə diqqət yetirməyi tövsiyə edir. Qırmızı xal:

* qısa müddətdə sürətlə böyüyürsə;
* rəngi və ya forması kəskin dəyişirsə;
* səbəbsiz və ya tez-tez qanayırsa;
* ətrafında iltihab yaranırsa;
* ağrı və ya yaralanma əmələ gəlirsə, dermatoloqa müraciət etmək lazımdır.

Həmçinin bir neçə həftə ərzində dəridə onlarla və ya yüzlərlə yeni qırmızı nöqtənin yaranması da mütləq həkim tərəfindən qiymətləndirilməlidir.

Angioma xərçəngə çevrilə bilər?

Dermatoloqun sözlərinə görə, albalı angioması xərçəngönü vəziyyət hesab edilmir və dəri xərçənginə çevrilmir. Dəyişməyən və narahatlıq yaratmayan törəmələrin müalicəsinə ehtiyac yoxdur.

Lakin angioma geyim, zinət əşyaları və ya təraş zamanı tez-tez zədələnirsə və ya estetik baxımdan narahatlıq yaradırsa, klinik şəraitdə lazer, elektrokoaqulyasiya, radiodalğa və bəzi hallarda cərrahi üsulla götürülə bilər.

Həkimlər angiomanı ev şəraitində sapla bağlamağı, turşu ilə yandırmağı və ya xalq üsullarından istifadə etməyi məsləhət görmürlər. Bu cür müdaxilələr qanaxma, infeksiya və çapıq yaranmasına səbəb ola bilər.

Əgər angioma təsadüfən zədələnərsə və qanama başlayarsa, həmin nahiyəyə təmiz salfetlə 10-15 dəqiqə fasiləsiz təzyiq göstərmək lazımdır. Qanaxma dayanmazsa və ya təkrarlanarsa, həkimə müraciət edilməlidir.