Ermənistan o xəritəni Azərbaycana verəcəkmi? – AÇIQLAMAbackend

Ermənistan o xəritəni Azərbaycana verəcəkmi? – AÇIQLAMA

Xəbər verdiyimiz kimi Azərbaycan Prezidenti İlham Əliyev yerli və xarici jurnalistlər üçün videoformatda keçirdiyi mətbuat konfransında Ermənistan tərəfinin hələ də minalanmış ərazilərin xəritəsini Azərbaycana təqdim etməməsi məsələsinə toxunub.

“Əsas çətinlik minalardır. Çünki erməni tərəfi mina sahələrinin xəritəsini bizə təqdim etmədi və bu, yeri gəlmişkən, cinayət olaraq qiymətləndirilə bilər, çünki hərbi əməliyyatlara son qoyulandan sonra bizdə həm hərbçi, həm də mülki şəxslərdən həlak olanlar olub. Buna səbəb mina sahələrin xəritəsinin təqdim olunmaması olub. Növbəti dəfə erməni tərəfinin davranışlarının qeyri-səmimiliyində əmin oluruq. Sözləri ilə əməlləri düz gəlmir. Biz onlara hərbi əsirləri, ölənlərin meyitlərini təhvil verdik. Biz özümüzü əxlaq normaları, insanlıq davranışları çərçivəsində aparırıq. Mina xəritələrinin bizə verilməməsi hərb qulluqçu və dinc sakinləri şüurlu şəkildə ölümə düçar etməkdir. Hansı əməkdaşlıqdan söhbət gedə bilər ki?”, – deyə dövlət başçısı bildirib.

Ölkə başçısının da vurğuladığı kimi, 44 günlük İkinci Qarabağ müharibəsinin yekunlaşmasına baxmayaraq hələ də şəhid xəbərləri almaqda davam edirik. İşğaldan azad olunan ərazilərdə ermənilərin çoxsaylı mina yerləşdirməsi mülki əhalinin, eləcə də hərbçilərimizin həyatını itirməsi ilə nəticələnir.

Maraqlıdır, belə olan halda Azərbaycan tərəfi Ermənistandan minalanan ərazilərin xəritəsini necə ala bilər?

KONKRET.az-ın məlumatına görə, məsələ ilə bağlı Beynəlxalq Münasibətlərin Təhlili Mərkəzinin sədri Fərid Şəfiyev bildirib ki, bu addımın atılması Rusiyaya da uyğundur:

“Hesab edirəm ki, danışıqlar prosesində bu məsələ qaldırılmalı və ətraflı müzakirə edilməlidir. Xəritənin təqdim edilməsində təkcə Azərbaycanın yox, həm də Rusiyanın marağı var. Məlum olduğu kimi, Rusiyanın sülhməramlıları da eyni zamanda təhlükə altındadır.

 

Ermənistan minaya düşərək həyatını itirən şəxslərə görə də məsuliyyət daşıyır. Bunu biz hüquqi qaydada həll edə bilərik”.

 

Qeyd edək ki, Azərbaycan, Ermənistan və Rusiya arasında imzalanan üçtərəfli sazişdən sonra aralarında mülki şəxslər də olmaqla, 15 nəfər azərbaycanlı işğaldan azad olunmuş ərazilərdə minaya düşərək həyatını itirib./sfera.az/

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*