Ermənistan Təhlükəsizlik Şurasının keçmiş katibi Armen Qriqoryan “Policy and Management Consulting Group” (PMCG) beynəlxalq konsaltinq şirkətinə baş məsləhətçi qismində qoşulub.

KONKRET.az xəbər verir ki, bu barədə şirkətin “LinkedIn”dəki rəsmi səhifəsində dərc olunan press-relizdə deyilir.

Şirkət Qriqoryanın dövlət idarəçiliyinin ali səviyyələrində əldə etdiyi təcrübəsinə istinad edərək qeyd edir ki, onun karyerası strateji idarəetmə, diplomatiya, institutsional islahatlar, böhranların idarə olunması və regional təhlükəsizlik sahələrini əhatə edir. Nəşrə əsasən, yeni təyin olunmuş baş məsləhətçi artıq PMCG-nin işində, xüsusilə də “TRIPP” infrastruktur proqramının həyata keçirilməsi prosesində fəal şəkildə iştirak edir.

Armen Qriqoryan 2018-ci ildən 2026-cı ilə qədər Təhlükəsizlik Şurasının katibi vəzifəsini tutub. Baş nazir Nikol Paşinyanın qərarı ilə bu ilin avqust ayında Armen Qriqoryan baş nazirin təklif etdiyi digər vəzifədə icra hakimiyyətində qalmaqdan imtina edərək Təhlükəsizlik Şurasının katibi vəzifəsindən azad edilib.

PMCG inkişaf sahəsində fəaliyyət göstərən beynəlxalq konsaltinq şəbəkəsidir və məqsədi “keçid dövrünü yaşayan və inkişaf etməkdə olan ölkələrin tərəqqisini” təmin etməkdir. Şirkət ABŞ, Gürcüstan, Ukrayna, Ermənistan, Özbəkistan, Polşa və İrlandiyada fəaliyyət göstərərək yerli hökumətlər, beynəlxalq təşkilatlar və özəl sektorla əməkdaşlıq edir.

Ermənistanda “PMCG Armenia” MMC vasitəsilə təmsil olunan təşkilat sosial-iqtisadi tərəqqiyə və institutsional potensialın inkişafına yönəlmiş struktur islahatlarının həyata keçirilməsində ixtisaslaşıb.

Natiq Səlim,
KONKRET.az