Son vaxtlar Ermənistanda turistlər tez-tez fırıldaqçıların qurbanına çevrilirlər. Sosial şəbəkələrin erməni seqmentində hətta ölkənin ən məşhur turist “guşələrində” belə biabırçı hallarla bağlı qızğın müzakirələr gedir.
KONKRET.az xəbər verir ki, “Sputnik Ermənistan”ın müxbiri fırıldaqçıların hansı hiylələrdən istifadə etdiyini və dövlətin bu kimi halların qarşısını almaq üçün hansı addımlar atdığını öyrənməyə çalışıb.
Hər il Ermənistana dünyanın hər yerindən səyahətçilər gəlir. Ancaq ölkədə bir çoxları qonaqlardan pul qoparır və müxtəlif hiylələrə əl atırlar. Bunlardan biri də “göyərçin” biznesidir. Hazırda bu biznes Xor Virap monastırının yaxınlığında çiçəklənir. Göyərçinin Türkiyədə yerləşən Ağrı dağına doğru bir dəfə havaya buraxılması üçün monastıra gələn qonaqdan 5000 dram (təxminən 12 dollar) alırlar.
Ermənistan Turizm Federasiyasının sədri Mexak Apresyan deyir ki, Xor Virapda bu hadisə yeni deyil. Zaman zaman göyərçinxanalara qarşı bəzi tədbirlər görülsə də, həll yolları həmişə müvəqqəti olub. İndi onlara qarşı heç bir tədbir görülmür.
Sosial şəbəkələrin erməni seqmentinin istifadəçiləri səlahiyyətli orqanların fəaliyyətsizliyindən narazılıqlarını bildirərək problemdən danışmağa başlayıblar.
İstifadəçilərdən bəziləri qeyd ediblər ki, başqa bir turizm yerində – Stepanavandakı Dendrari parkının yaxınlığında bəzi turistlərdən heç bir yol nişanı olmayan, kimsəsiz yerdə avtomobil saxlamaq üçün pul tələb olunur. Fırıldaqçıların fikrincə, bura ümumiyyətlə boş ərazi deyil, dayanacaqdır, üstəlik pulludur.
Ermənistan İqtisadiyyat Nazirliyinin Turizm Komitəsinin ictimaiyyətlə əlaqələr üzrə eksperti Qayane Ayvazyan mövzu ilə bağlı deyib ki, agentlik yalnız problem barədə ictimaiyyəti məlumatlandırmaq səlahiyyətinə malikdir, lakin onu həll etmək üçün heç bir rıçaq yoxdur.
Bununla bağlı Ermənistanın Təhsil və Elm Nazirliyinin Tarix və Mədəniyyət Abidələrinin Mühafizəsi Departamentinin rəhbəri Arutyun Vanyan bildirib ki, tarixi yerlərin ətrafındakı ərazi mühafizə zonasıdır. Onlar üçün xüsusi tənzimləmə var ki, mühafizə olunan ərazidə nələr edilə və nələr edilə bilməz: “Əsasən, müddəalar ərazinin inkişafı ilə bağlıdır. Ümumiyyətlə, göyərçinlər haqqında burada heç nə yazılmayıb, çünki bu barədə düşünən yoxdur”.
Vanyan qeyd edib ki, bütün fəaliyyət göstərən kilsələr, o cümlədən Xor Virap monastırı Müqəddəs Taxt-Tacın yurisdiksiyasındadır. Müvafiq olaraq, onların ərazisində baş verənlərə görə məsuliyyət daşıyan Eçmiədzindir.
Xor Virapın özünə gəlincə, Turizm Komitəsinin Dünya Bankının Kredit Proqramı çərçivəsində abadlıq və parkinq üzrə böyük proqramı var. Layihəyə əsasən, ticarət üçün standart pavilyonlar da tikiləcək.
Mexak Apresyan qeyd edir ki, turizm təbii ki, ölkə iqtisadiyyatını stimullaşdırmalı və yerli sakinlər öz mədəniyyətlərini, sənətkarlıqlarını təqdim etməli və bundan pul qazanmalıdırlar:
“Ancaq bütün bunlar səriştəli şəkildə təşkil edilməlidir ki, qonaq ona dəqiq nə təklif olunduğunu və bunun nə qədər başa gələcəyini əvvəlcədən bilsin.
Bizim əsas vəzifəmiz turistləri məmnun etməkdir və onların bizi məyus etməsinə heç vaxt imkan verməməliyik. Bu gün onlardan nəyisə “qoparmaq” şirəsi sabah pis nəticələrə çevrilə bilər. Odur ki, sferada nəzarət çox zəruridir”.
“Armenikos Tour”un təsisçisi Marqarita Azaryan deyir ki, şirkətin bələdçiləri həmişə qonaqları aldadılma riskləri barədə xəbərdar edirlər:
“Xor Virapa gedəndə, şübhəsiz ki, ziyarətçilərə xəbərdarlıq edirik ki, göyərçini göyə buraxmaq ləzzəti üçün pul ödəmək lazım gələcək. Turistləri Sevana aparanda da eyni şey olur. Monastıra çıxanda yerli əhali, əsasən məktəbyaşlı oğlanlar “bizdə şam var, alın, yuxarıda yoxdur” deyirlər. Bununla belə, kilsənin özündə daha aşağı qiymətə şamların olduğunu bildiririk”.
Marqaritanın sözlərinə görə, bu baxımdan onlarda hər şey nəzərdə tutulub və heç bir xoşagəlməz hal yoxdur:
“İrəvan küçələrində eyvanlarda və restoranların açıq terraslarında əyləşən qonaqları incidən dilənçilərlə “məşğul olmaq” qat-qat çətindir”.
Roman Göytürk,
KONKRET.az