ABŞ Türkiyə ilə F-16 müqaviləsinə qoyulan məhdudiyyətləri aradan qaldırır.

KONKRET.az xəbər verir ki, bu barədə Türkiyənin “Yeni Şafak” qəzeti yazıb. Qəzet bildirir ki, ABŞ Senatı Türkiyə ilə F-16 sövdələşməsinə dair qanun layihəsinin variantındakı məhdudlaşdırıcı şərtləri ləğv edib və Nümayəndələr Palatasından da oxşar addımlar gözlənilir.

“F-16-ların Türkiyəyə satışı ilə bağlı qanun layihəsinə əlavə edilən bütün məhdudlaşdırıcı şərtlər qanun layihəsinin Senat versiyasından çıxarılıb. Senat qanun layihəsini yekunlaşdırdıqdan sonra o, Nümayəndələr Palatasının versiyası ilə birgə mətnə ​​çevriləcək və təsdiq üçün ABŞ prezidenti Co Baydenə göndəriləcək.

Xatırladaq ki, ABŞ daha əvvəl Ankaranın Rusiyadan S-400 hava hücumundan müdafiə sistemlərini alması səbəbindən Türkiyəyə ən son F-35 qırıcılarının tədarükü proqramından çıxarılması ilə bağlı rəsmi bildiriş göndərib.

Bir müddət əvvəl Türkiyənin müdafiə sənayesi departamentinin rəhbəri İsmayıl Dəmir CNN Türk telekanalına verdiyi açıqlamada Amerika F-16-larının alınması ilə bağlı razılaşmanın baş tutmaması halında ölkənin Rusiyadan Su-35 qırıcılarını almağı nəzərdən keçirə biləcəyini bildirib.

Bundan əvvəl Türkiyə Prezidenti Rəcəb Tayyib Ərdoğan PBS telekanalına müsahibəsində ölkəsinin ABŞ-dan F-16 qırıcıları almasa belə, öz qayğısına qalacağını diqqətə çatdırıb.

Ötən ilin oktyabrında Ankara Vaşinqtondan Türkiyə hərbi təyyarələrinin modernləşdirilməsi üçün 40 Lockheed Martin F-16 qırıcısı və 80-ə yaxın komponent almağı xahiş edib.

2022-ci ilin iyulunda ABŞ prezident administrasiyasının yüksək rütbəli rəsmisi ABŞ Konqresindəki etirazlara baxmayaraq Türkiyənin F-16 qırıcıları almaq təklifini dəstəklədiyini bildirib.

Xuraman Etibarlı,

KONKRET.az