Fransa prezidentiEmmanuel Makron etirazçıların böyük qrupunun Parisin şimalındakı “Buf-dyu-Nor” teatrına soxulmağa çalışdığından sonra polisin müşayiəti ilə teatr binasını tərk edib.

KONKRET.AZ TASS-a istinadən xəbər verir ki, bu barədə “Le Figaro” qəzeti şahidlərə istinad edərək bildirib.

“Mən respublika prezidentinin arxasındakı üçüncü sıradayam. Nümayişçilər harada isə yaxınlıqdadır”, – deyə nəşr “Twitter”də özünün videogörüntüsünü paylaşmış internet istifadəçisinin sözlərini sitat gətirib. Videogörüntüdə Makron da yer alıb.

Bundan sonra başqa bloqer bildirib ki, Fransa paytaxtının X dairəsində yerləşən teatr binasının qarşısında təxminən100-200 nəfər toplaşıb. Əraziyə operativ olaraq xüsusi təyinatlı polis dəstəsi CRS əməkdaşlarının böyük qrupu gəlib.

Qəzetin məlumatına görə, nümayiş iştirakçıları teatra soxulmağa çalışıblar, ancaq polis onları sıxışdıraraq binadan çıxarıb. Bundan sonra polislər prezidentin yola düşməsi üçün canlı dəhliz yaradıblar.

“Twitter” istifadəçilərindən biri prezidentin uzaqlaşan avtomobilinin yer aldığı videogörüntü yayıb. Qeyd edilir ki, vəziyyət bu halda gərgin olub, amma toqquşmalara gətirib çıxarmayıb.