1920-ci illərin frik-şoularının məşhur ulduzlarından biri olan Syuzi ixtioz adlı nadir dəri xəstəliyindən əziyyət çəkirdi.

Bu xəstəlik nəticəsində dərinin buynuzlaşma prosesi pozulur, dəri qalınlaşır, quruyur, çatlayır və iri pulcuqlarla örtülür. Syuzi’nin dərisi boz rəngli, kobud və çatlamış olduğuna görə onu “fil dərili qız” adlandırırdılar.

O dövrdə belə fərqli görünüşə malik insanların cəmiyyətdə normal iş tapması demək olar ki, mümkün deyildi. Buna görə də Syuzi üçün yeganə qazanc yolu sirk və frik-şoularda çıxış etmək oldu. Tamaşaçılar onu maraq və təəccüblə izləyir, bu isə ona yaxşı gəlir qazandırırdı.

Lakin maddi uğurlarına baxmayaraq, şahidlərin xatirələrinə görə, Syuzi bu həyatdan xoşbəxt deyildi. O, sakit və utancaq xarakterə malik idi, insanların qarşısında yalnız görünüşünə görə nümayiş etdirilməsini alçaldıcı hesab edirdi. Bununla belə, yaşamaq və dolanışığını təmin etmək üçün bu işi davam etdirməyə məcbur idi.

Bu gün ixtioz xəstəliyi daha yaxşı öyrənilib və müxtəlif müalicə üsulları sayəsində xəstələrin həyat keyfiyyətini artırmaq mümkündür. Müasir cəmiyyətdə isə belə insanlara fərqliliklərinə görə deyil, şəxsiyyətlərinə və hüquqlarına hörmətlə yanaşılması vacib hesab edilir. Syuzinin həyatı bizə xatırladır ki, keçmişdə bir çox insanlar sadəcə xarici görünüşlərinə görə ayrı-seçkiliyə məruz qalır, öz istəklərinin əksinə olaraq səhnəyə çıxmağa məcbur olurdular. Bu hekayə həm tibb tarixinin, həm də insan hüquqları uğrunda aparılan mübarizənin düşündürücü nümunələrindən biridir.

Hazırladı: Ağagül Mürsəlov,
KONKRET.az