Goranboyda aparılan arxeoloji qazıntılar zamanı müxtəlif rəngli muncuqlar, saxsı qablar, fərqli formalı insan skeletləri tapılıb.

KONKRET.az məlumatına görə, eradan əvvəl IX-VIII əsrlərə, təxminən 2900-2800-il əvvələ təsadüf edən nekropol rayonun Tatarlı kəndi ərazisində yerləşən Muncuqlutəpədə aşkarlanıb.

AMEA-nın Naftalan-Goranboy arxeoloji ekspedisiyasının qazıntılar apardığı ərazi 1 ha-dan artıqdır. Son tunc və erkən dəmir dövrünə aid olan nekropolda bu günə qədər 19 qəbirdə arxeoloji qazıntı işləri aparılıb. Düzbucaqlı və oval formalarda hazırlanmış qəbirlərdə skeletlər sağ və sol yanı üstə, bükülü və yarımbükülü vəziyyətdə dəfn edilib. Burada qəbirlərin sıx olması daha çox diqqət çəkir.

AMEA-nın Naftalan-Goranboy arxeoloji ekspedisiyasının rəisi Müzəffər Hüseynov bildirib ki, Tatarlı kəndi ərazisində yerləşən nekrapol Xocalı-Gədəbəy mədəniyyətinin son dövrü, erkən dəmir dövrünə aiddir. Antropoloqlar bu nekropolun digərlərindən fərqləndiyini, qəbirlərin standart olmadığını bildirirlər.

Qeyd edək ki, Goranboy rayonu ərazisində yerləşən Muncuqlutəpə nekropolunda qazıntı işləri davam etdirilir. Oradan aşkar edilən maddi-mədəniyyət nümünələri laborator şəraitdə tədqiq olunacaq və müəyyən nümünələr xarici ölkələrə göndəriləcək./report