Bakı Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada təqsirləndirilən Fərrux Məhərrəmovun (adı, soyadı şərtidir) cinayət işinin bəzi detalları məlum olub.

KONKRET.az pravdaaz-a istinadən xəbər verir ki, hakim Murad Aslanovun sədrliyi ilə keçirilən prosesdə ittiham aktı elan olunub.

İttiham aktına əsasən, hadisə 2025-ci ilin fevral ayında Bakı şəhərinin Qaradağ rayonu, Qobustan qəsəbəsində yerləşən “Şəhriyar” şadlıq sarayının yaxınlığında baş verib.

Belə ki, Fərrux Məhərrəmov zərərçəkmiş Vüsal Cabbarovun (adı, soyadı şərtidir) bir müddət əvvəl onun ünvanına nalayiq ifadələr işlətməsini bəhanə edərək onunla mübahisəyə başlayıb.

Hadisə baş verən vaxt təqsirləndirilən şəxs orta dərəcəli sərxoşluq vəziyyətində olub.

Fərrux mübahisədən əvvəl yaşadığı evdən özü ilə bıçaq götürərək üzərində daşıyıb.

Tərəflər arasında yaranmış mübahisə qısa müddət sonra fiziki qarşıdurmaya çevrilib.

Təqsirləndirilən şəxs heç bir əsaslı səbəb olmadan xuliqanlıq niyyəti ilə üzərində gəzdirdiyi bıçağı çıxarıb və Vüsala ardıcıl zərbələr endirib. Zərbələr nəticəsində Vüsalın üz nahiyəsinə, alt dodağına və bədəninin müxtəlif hissələrinə xəsarətlər yetirilib.

Məhkəmə-tibbi ekspertizasının rəyinə əsasən, zərərçəkmiş şəxsdə alt dodağın və bel nahiyəsinin kəsilmiş-deşilmiş yaraları müəyyən olunub.

Bununla yanaşı, zərərçəkmiş şəxsin üzünün sol hissəsində kəsilmiş yara aşkar edilib.

Araşdırmalar zamanı müəyyən edilib ki, yaranmış fəsadlar sifətin silinməz dərəcədə eybəcərləşməsinə səbəb olub.

Toplanmış sübutlar əsasında təqsirləndirilən şəxsə qəsdən sağlamlığa ağır zərər vurma ittihamı elan olunub.

Məhkəmə iclasında Fərrux Məhərrəmov elan edilmiş ittiham üzrə özünü təqsirli bilməyib.

Məhkəmənin hökmü ilə o, 7 il müddətə azadlıqdan məhrum edilib.