Bakıda yeni tikilidən mənzil almaq bir çoxları üçün illərlə davam edən arzuya çevrilir. Amma açarı əldə edib evə köçəndən sonra bəzi sakinlər başqa problemlərlə üzləşdiklərini deyirlər. Lift, “ev pulu”, su, istilik, parklanma və hətta mənzilin sənədləri ilə bağlı narazılıqlar yeni binalarda tez-tez gündəmə gəlir.
KONKRET.az yenisabah-a istinadən xəbər verir ki, Bakıda son yeni tikili mənzil alan sakinlərin şikayətlərini araşdırdıqda bir neçə problemin daha çox təkrarlandığı görünür. Burada söhbət bütün yeni tikililərdə eyni vəziyyətin olduğundan getmir. Söhbət müxtəlif illərdə müxtəlif binaların sakinləri tərəfindən dilə gətirilən ümumi problemlərdən gedir.
“Ev pulu” və əlavə ödənişlər
Yeni tikililərdə sakinlərin ən çox müzakirə etdiyi məsələlərdən biri binanın saxlanması üçün aylıq ödənişlərdir, yəni “Komendant pulu”. Lift, mühafizə, təmizlik, həyətin saxlanması və digər xidmətlər üçün müxtəlif məbləğlər tələb olunur. Bakının müxtəlif rayonlarındakı binalarda bu ödənişlərin kvadratmetrə, otaq sayına və ya başqa qaydada hesablandığı barədə sakinlərin şikayətləri tez-tez social şəbəkələrdə görünür. Bəzi sakinlər əsas narazılıqlarının ödənişin məbləğindən çox, toplanan vəsaitin hara xərcləndiyinin aydın olmaması olduğunu bildirirlər.
Mənzil Məcəlləsinə görə isə çoxmənzilli binanın idarə olunması ilə bağlı müqavilədə göstərilən xidmətlər, ödənişin müəyyənləşdirilməsi qaydası və ödəniş qaydası qeyd edilməlidir.
Lift problemi: Yeni bina, köhnə narahatlıq
Yeni tikilidə ev alan sakin üçün lift əsas xidmətlərdən biridir. Xüsusilə 15-20 mərtəbəli binalarda liftin işləməməsi birbaşa gündəlik həyat probleminə çevrilir. Bakıda yeni binaların sakinlərinin liftlərin tez-tez sıradan çıxması, təmir üçün əlavə pul yığılması və bəzi hallarda liftlərin sayının azaldılması ilə bağlı şikayətləri müxtəlif vaxtlarda mediada yer alıb.
Belə vəziyyətdə problem təkcə mənzil sahibinin mərtəbəsinə qalxması ilə bitmir. Yaşlı insanlar, uşaqlı ailələr və hərəkət imkanları məhdud şəxslər üçün liftin işləməməsi daha ciddi çətinlik yaradır.
“Çıxarış nə vaxt veriləcək?”
Mənzil alarkən çoxlarının düşündüyü ilk məsələlərdən biri evin sənədləridir. Lakin yeni tikilidə mənzil alan şəxsin müqaviləni imzalaması hələ avtomatik olaraq çıxarışın hazır olması demək deyil.
Əmlak Məsələləri Dövlət Xidmətinin məlumatına görə, MTK-dan alınan mənzil üzrə çıxarışın əldə edilməsi üçün binanın istismara qəbul edilib-edilməməsi mühüm şərtlərdəndir. MTK tərəfindən tikilmiş və istismara qəbul edilmiş binada çıxarış üçün, digər sənədlərlə yanaşı, mənzilin verilməsi barədə qərar və maliyyə arayışı tələb olunur.
Bakıda bəzi MTK-ların sakinləri isə illərlə sənəd ala bilməmələri ilə bağlı şikayət edirlər. Ayrı-ayrı hallarda sakinlər mənzilin pulunu tam ödədiklərini, lakin çıxarış üçün lazımi sənədləri əldə edə bilmədiklərini bildirirlər.
Mənzil 100 kvadrat deyil?
Digər narazılıq mənzilin sahəsi ilə bağlıdır. Alıcı müqavilədə 100 kvadratmetr mənzil görür, lakin sonradan çıxarışda daha az sahə ilə qarşılaşa bilər. Bununla bağlı artıq məhkəmə təcrübəsi də formalaşıb.
Ali Məhkəmə 2026-cı ilin iyulunda açıqlamasında bildirib ki, belə mübahisələrdə ilk növbədə müqavilənin şərtlərinə baxılmalıdır. Yəni mənzilin sahəsinin necə hesablanacağı müqavilədə ayrıca razılaşdırılıbsa, məsələ həmin şərtlərə uyğun qiymətləndirilir. Bu səbəbdən mənzil alan zaman müqavilədə sahənin hansı qaydada hesablandığına da diqqət etmək vacibdir.
Su, istilik və kommunal xidmətlər
Yeni binaya köçən sakinlərin gözləntisi bütün kommunal xidmətlərin problemsiz işləməsidir. Reallıqda isə bəzi binalarda su təchizatı, istilik və digər kommunal məsələlərlə bağlı narazılıqlar ortaya çıxır. Məsələn, Bakıda ayrı-ayrı yeni yaşayış komplekslərinin sakinləri suyun verilməsində fasilələr və kommunal sistemlərin tikinti şirkəti tərəfindən idarə olunması ilə bağlı problemlərdən şikayət edirlər.
İstilik məsələsi də xüsusilə qış aylarında özünü göstərir. “Azəristiliktəchizat” açıqlamalarında yeni tikili binaların istilik sistemi ilə bağlı məsuliyyətin binanın daxili sisteminin qurulmasından asılı olduğu bildirilib.
Maşın saxlamağa yer yoxdur
Mənzil seçərkən alıcıların çoxu ilk növbədə evin sahəsinə, təmirinə və yerləşdiyi əraziyə baxır. Bir müddət sonra isə başqa problem ortaya çıxır: avtomobili harada saxlayaq? Sakinlərin bəzi şikayətlərində binanın həyətində parklanma yerlərinin kifayət etməməsi, qaraj və dayanacaqlardan kənar şəxslərin istifadə etməsi ilə bağlı narazılıqlar da yer alır. Bu problem xüsusilə həyəti kiçik, mənzil sayı çox olan komplekslərdə daha ciddi hiss olunur. Çox vaxt isə yeni tikili binalarda qaraj ayrıca satılır və qiyməti əl yandırır.
Sakinlə MTK arasında əsas problem nədir?
Əslində, sadalanan problemlərin çoxu binanın necə idarə olunması ilə bağlıdır. Sakinlər aylıq ödənişlərin nəyə görə toplandığını, bu pulun hara xərcləndiyini və binada hansı işlərin görüldüyünü bilmək istəyirlər.
Qanunvericiliyə görə, bina sakinləri binanın idarə olunmasında iştirak edə və ümumi məsələlərlə bağlı qərarlar verə bilərlər. Bunun üçün sakinlərlə binanı idarə edən qurum arasında xidmətlər və ödənişlərlə bağlı aydın razılaşma olmalıdır.
Yəni yeni tikilidən mənzil almaqla bütün problemlər həll olunmur. Sakin sonradan liftə, binanın təmizliyinə, aylıq xidmət haqqına, parklanma yerinə, suya və digər məsələlərə görə əlavə problemlərlə üzləşə bilər.
Buna görə də Bakıda yeni tikilidən ev alan şəxslər üçün əsas sual təkcə mənzilin qiyməti olmamalıdır. Binanın sənədləri, istismara qəbul vəziyyəti, aylıq xidmət haqqının nəyə görə hesablandığı, liftlərin vəziyyəti, parklanma imkanları və kommunal sistemlərin necə idarə edildiyi də əvvəlcədən araşdırılmalıdır. Çünki çox vaxt mənzilin qapısını açandan sonra qarşıya çıxan problemləri həll etmək, onu almaqdan daha çətin olur.