İranın anti-Azərbaycan isteriyası Qafqazdakı vəziyyətlə bağlı qorxularına görədir.
KONKRET.az xəbər verir ki, bu barədə israilli iranşünas, doktor Raz Zimt “Oriental Express” analitik nəşrinə müsahibəsində deyib.
“Hələlik rejim üçün təhlükə yoxdur. Çünki SEPAH daxil olmaqla, güc strukturlarında hələ də parçalanma baş verməyib. Tacirlərin və neftçilərin ara-sıra tətilləri bir yana, geniş sosial təbəqə hələ də etirazlara qoşulmayıb.
Rejim bu etirazları boğmaq gücündə deyil və onlar uzun müddət davam edə bilər.
Anti-Azərbaycan isteriyası İranın Qafqazdakı vəziyyətlə bağlı qorxuları ilə əlaqəlidir, lakin iki ölkə arasında real toqquşma ehtimalı azdır.
Bugünkü şəraitdə İran və Səudiyyə Ərəbistanı arasında gərginliyin artması məni daha çox narahat edir. Şübhəsiz ki, İran artıq iki ildir ki, Qarabağda müharibə başa çatdıqdan sonra çox narahatdır. Onlar Zəngəzur dəhlizi ətrafında yaranmış vəziyyətdən çox narahatdırlar və qorxuları əsassız deyil. Onlar hesab edirlər ki, Azərbaycan öz ərazisini başqa qüvvələrə, məsələn, İsrailə versə, farslar üçün təhlükə yarada bilər. Təbii ki, orada baş verənlər iranlıların heç xoşuna gəlmir, ona görə də manevr edir, məzəmmət edirlər. Amma bu vəziyyətin real qarşıdurmaya səbəb ola biləcəyini təsəvvür etmək son dərəcə çətindir”, – deyə Zimt bildirib.
Daha sonra o, Rusiya-İran münasibətlərinə toxunub.
“Nəticə etibarı ilə İranın Rusiyaya qarşı çoxdankı şübhəsi təkcə tarixlə bağlı deyil. Son bir ildə Rusiya İranın xoşuna gəlməyən işlər görür. Məsələn, Çinə nefti endirimlə tədarük edir ki, bu da İran neftinin ixracını azaldır. Tehran Rusiyanın onlardan istifadə etdiyindən şübhələnir.
Amma son nəticədə İran və Rusiyanın indi seçimi yoxdur. Demək olmaz ki, İran Avropa və Rusiya arasında seçim etməlidir. Beləliklə, onlar Rusiya qarşısında öhdəliklərinə sadiq qalırlar. İran rəhbərliyinin strategiyası tamamilə başa düşüləndir. Çətin ki, indi bunu nəyisə dəyişdirə bilsin, xüsusən də nüvə sazişinə qayıdış çətin görünəndə”, – deyə siyasətçi fikrini tamamlayıb.
Xuraman Etibarlı,
KONKRET.az