İsrail ABŞ-nin daxili siyasi problemlər və qlobal iqtisadi böhranın daha da artması riski səbəbindən İrana qarşı hərbi əməliyyatları bərpa etməsinə şübhə ilə yanaşır.

KONKRET.az xəbər verir ki, bu barədə “Al-Monitor” İsrailin hökumət mənbələrinə istinadla məlumat yayıb.

Portalın mənbələri bildiriblər ki, İsrail ABŞ-dəki vəziyyəti nəzərə alaraq, İrana qarşı gələcək hərbi tədbirlər üçün bütün mümkün ssenariləri nəzərdən keçirir. Amma İsrail ABŞ-nin İran ərazisinə zərbə endirməyəcəyini ehtimal edir.

“Al-Monitor”un mənbələri həmçinin İsrail Baş naziri Benyamin Netanyahu ilə ABŞ Prezidenti Donald Tramp arasında təmasların əhəmiyyətli dərəcədə azalmasına və iki ölkə arasında münasibətlərin soyumasına da diqqət çəkib.

İsrail hesab edir ki, ABŞ-nin əsas məqsədi hazırda Hörmüz boğazına nəzarəti İrandan almaq və Vaşinqtonun istifadəsi üçün əlverişli şərtlər tətbiq etməkdir. Həmçinin İsrail ABŞ liderinin Hörmüz boğazına fokuslanmasının Vaşinqtonu hərbi əməliyyatın ilkin səbəbi olan İranın nüvə və ballistik raket proqramlarına laqeyd qalmasına səbəb olacağından ehtiyat edir./teleqraf