Avstraliya Rusiyanın Kanberradakı səfirliyinin yeni binası üçün icarə müqaviləsini ləğv etmək qərarına gəlib.

KONKRET.az xəbər verir ki, Kanberra hakimiyyəti Rusiyanın Avstraliyadakı səfirliyinin tikintisi üçün nəzərdə tutulan torpaq icarəsinə xitam verildiyini elan edib. Buna səbəb üç il ərzində tikintini başa çatdırmağı vəd edən Rusiya Federasiyasının öhdəliklərini yerinə yetirməməsi olub.

“İcarə müqaviləsinə əsasən, Rusiya Federasiyası tikintini üç il ərzində başa çatdırmağa razılaşıb. Səfirliyin təşviqi üçün edilən səylərə baxmayaraq, layihə tamamlanmayıb”,- hesabatda deyilir.

Bundan əlavə, NCA-nın rəhbəri Salli Barnes bildirib ki, tikintisi yarımçıq qalmış bina Kanberrada diplomatik nümayəndəliklər və xarici nümayəndəliklər üçün ayrılmış ərazinin ümumi estetikasını, əhəmiyyətini və ləyaqətini korlayıb.

Hesabatda vurğulanır ki, bu hərəkətlər indiki səfirliyin işinə təsir etməyəcək və gələcəkdə Rusiya torpaq sahəsinin verilməsi üçün yenidən müraciət edə bilər.

Rusiya Kanberrada yeni səfirlik binasının tikintisi hüququnu 2011-ci ildə alıb. Müqaviləyə əsasən üç il ərzində tikinti işləri tamamlanmalı idi, lakin bu baş verməyib.

Qeyd edək ki, bundan əvvəl kenquru Rusiyanın Avstraliyadakı səfirliyinin ərazisinə girməyə cəhd edib. “Hücum” anı müşahidə kamerası tərəfindən lentə alınıb. Heyvan səfirliyin hasarından tullanıb, sonra barmaqlıqlar arasında ilişib. İki uğursuz cəhddən sonra kenquru yoluna davam edib.

Xuraman Etibarlı,

KONKRET.az