YouTube platformasının həmtəsisçilərindən biri və saytda yayımlanan ilk videonun müəllifi Caved Kərim şirkətin qərarlarını açıq şəkildə tənqid etmək üçün həmin videonun təsvir bölməsindən istifadə edib.

2013-cü ildə Kərim videolara şərh yazmaq üçün YouTube hesabının Google+ sosial şəbəkə profili ilə əlaqələndirilməsi tələbini tənqid edib. O bildirib ki, şərh yazmaq naminə ayrıca sosial şəbəkə hesabı yaratmaq məntiqsizdir. Onun bu reaksiyası YouTube ilə Google+ platformalarının inteqrasiyasına qarşı istifadəçilərin narazılığının diqqətçəkən nümunələrindən birinə çevrilib.

2021-ci ilin noyabrında Kərim eyni videonun təsvirini yenidən redaktə edərək bu dəfə YouTube-un videolardakı dislike — bəyənməmə sayını gizlətmək qərarına etiraz edib.

Bəyənməmə düyməsi platformada qalsa da, istifadəçilər artıq mənfi qiymətləndirmələrin ümumi sayını görə bilmirdilər. Kərimin fikrincə, bu məlumat izləyicilərə videonun keyfiyyətini qiymətləndirməkdə kömək edir, onları keyfiyyətsiz və ya yanlış məlumat verən məzmundan qorumağa xidmət göstərirdi.

Beləliklə, YouTube-da yayımlanan ilk video yalnız internet tarixinin bir parçası olaraq qalmayıb. O, həm də platformanın öz həmtəsisçisinin şirkətin qərarlarını tənqid etdiyi bir məkana çevrilib.

Ağagül Mürsəlov,
KONKRET.az