“Azərbaycanda 2023-cü ilin yanvar-fevral aylarında 456 ədəd minik avtomobili istehsal edilib.  Buna “yerli avtomobil istehsalı” deyirlər. Hətta nazirliklərə, məmurlara tapşırmışdılar ki, “yerli avtomobillərə” keçid etsinlər. Əslində isə o maşınlarda yerli olan tək şey təkərlərinə vurulan havadır. Qalan hər bir detal, hətta bolt-qayka belə xaricdən gətirilir”.

KONKRET.az xəbər verir ki, bu fikirləri REAL-ın icra katibi, tanınmış iqtisadçı Natiq Cəfərli səsləndirib. O bildirib ki,
ilin ilk 2 ayı ərzində Azərbaycanda 456 ədəd maşın yığılıb: “İndi soruşa bilərsiniz ki, bəs bu təzə maşınlardan neçəsi satılıb?! Soruşmayın, çünki, satış yoxdur. Hətta anbarlarda keçən ildən qalan maşınlar da var. Təsəvvür edin ki, 2023-cü ilin martın birinə olan məlumata görə anbarlarda satılmamış 465 avtomobil qalıb”.

Natiq Cəfərli əsl maşın istehsalı necə olur sualına da aydınlıq gətirib: “Məsələn, “Toyota” şirkəti dəqiqəyə 20, günə 28 000, aya 872 min avtomobil istehsal edir. Yəni, Azərbaycanın 60 günə (iki aya) yığdığı və adına da “yerli istehsal” dediyi 456 maşını “Toyota” şirkəti cəmi 23 dəqiqəyə istehsal edir.

Müşviq Tofiqoğlu,

KONKRET.az