2020-ci il sentyabrın 27-də Ermənistanın növbəti hərbi təxribatına cavab olaraq Azərbaycan Ordusu əks-həmlə əməliyyatına başlamış və 44 gün davam edən Vətən müharibəsi nəticəsində torpaqlarımız işğaldan azad olunmuş, ölkəmizin ərazi bütövlüyü bərpa edilmişdir.
Azərbaycan Respublikası öz torpaqlarını azad etməklə tarixi inkişafının irimiqyaslı bərpa-quruculuq layihələri ilə səciyyələnən, dayanıqlı sülhə, tərəqqiyə əsaslanan və bir çox ölkələr üçün nümunə olan yeni mərhələsinə qədəm qoymuşdur. Vətən müharibəsindən ötən müddət ərzində işğaldan azad olunmuş ərazilərin minalardan və partlamamış hərbi sursatdan təmizlənməsi, müasir yaşayış, istehsal və xidmət infrastrukturunun qurulması, iqtisadi fəaliyyətin, o cümlədən nəqliyyat-kommunikasiya xətlərinin bərpası, xüsusilə Zəngəzur dəhlizinin açılması istiqamətində mühüm işlər görülmüşdür.
Həyata keçirilən məqsədyönlü və genişmiqyaslı layihələr Qarabağ və Şərqi Zəngəzur iqtisadi rayonlarının sürətlə dirçəlməsinə, əhalinin dayanıqlı məskunlaşmasına və davamlı iqtisadi aktivliyinin təmin olunmasına xidmət edir, habelə həmin ərazilərin yüksək inkişaf etmiş regiona çevrilməsi üçün sağlam bünövrə yaradır.İşğaldan azad olunmuş ərazilərdə “Böyük Qayıdış” proqramı çərçivəsində genişmiqyaslı quruculuq və bərpa işləri uğurla davam etdirilir.
Azərbaycan Respublikası Prezidentinin 2021-ci il 2 fevral tarixli 2469 nömrəli Sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər”ə uyğun olaraq hazırlanmış “Azərbaycan Respublikasının 2022–2026-cı illərdə sosial-iqtisadi inkişaf Strategiyası”, həmçinin “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” uğurla icra olunur və bu, ölkənin sosial, iqtisadi və institusional inkişafı üçün mühüm zəmin yaratmışdır.
Sözügedən Strategiya sosial-iqtisadi inkişaf üzrə müəyyən edilmiş beş Milli Prioritet əsasında həyata keçirilir. Həmin Strategiyanın ardıcıl və sistemli icrası sayəsində iqtisadiyyatın xarici təsirlərə qarşı dayanıqlığı daha da möhkəmlənmiş, şaxələnməsi dərinləşmiş, iqtisadi artım davamlı və inklüziv xarakter almış, əhalinin rifah səviyyəsi yüksəlmiş və gələcək nəsillər üçün irihəcmli maliyyə ehtiyatları formalaşmışdır.
Qeyd olunan nəticələrin əldə edilməsində özəl təşəbbüslərin və investisiyaların cəlbinin təşviqi, biznes mühitinin əlverişliliyinin dəstəklənməsi, qlobal bazarlara çıxış imkanlarının genişləndirilməsi, eləcə də rəqəmsallaşma və insan kapitalının inkişafı mühüm rol oynamışdır. Bununla yanaşı, işğaldan azad edilmiş ərazilərin bərpası və iqtisadi fəaliyyətə reinteqrasiyası, əhalinin öz yurdlarına təhlükəsiz şəkildə qayıtması, habelə Qarabağ və Şərqi Zəngəzurda dayanıqlı məskunlaşmanın və məşğulluğun təmin olunması istiqamətində görülən işlər Böyük Qayıdış prosesini ölkənin sosial-iqtisadi inkişafında qazanılan nailiyyətlərin ayrılmaz tərkib hissəsinə çevirmişdir.
Azərbaycan qarşıdakı illərdə daha mürəkkəb çağırışların və zəngin imkanların mövcudluğu ilə seçilən yeni mərhələyə daxil olur. Bu mərhələ qlobal iqtisadi qütbləşmənin dərinləşməsi, texnoloji tərəqqinin sürətlənməsi, eləcə də süni intellekt əsaslı texnologiyaların geniş tətbiqi ilə səciyyələnir.
Mövzu ilə bağlı sabiq deputat, siyasi təhlilçi Elşad Mirbəşiroğlu KONKRET.az-a açıqlamasında bildirib ki, Ermənistanın işğalı altında olmuş torpaqlarımız azad edildikdən və Azərbaycanın suverenliyi bütün ərazilər boyunca etibarlı şəkildə təmin olunduqdan sonra Prezident İlham Əliyev həmin bölgələrin dünyanın ən inkişaf etmiş məkanlarından birinə çevriləcəyini bəyan edib.
Onun sözlərinə görə, artıq bu istiqamətdə sürətli inkişaf, keyfiyyətli infrastruktur quruculuğu və əhalinin effektiv məskunlaşması müşahidə olunur:
“Prezidentin rəhbərliyi ilə işğaldan azad edilmiş ərazilərdə təhlükəsizlik tədbirləri prioritet kimi müəyyənləşdirilib. Ərazilərin minalardan təmizlənməsi istiqamətində genişmiqyaslı fəaliyyət aparılır. Bunun ardınca müasir şəhərsalma konsepsiyasına uyğun olaraq bərpa və tikinti işlərinə start verilib.”
Siyasi təhlilçi qeyd edib ki, dövlət başçısı məsələyə kompleks yanaşaraq həmin ərazilərdə sənaye parklarının yaradılması, yaşıl enerji zonalarının formalaşdırılması, məktəblərin, xəstəxanaların, idman komplekslərinin və digər infrastruktur obyektlərinin inşasını təmin edib:
“Bu layihələr insanların müasir həyat şəraitinə çıxışını və məşğulluğunu təmin edir. Artıq 70 mindən çox insan Qarabağ və Şərqi Zəngəzurda ən yüksək tələblərə cavab verən şəraitdə məskunlaşdırılıb. Bu proses hər ay davam edir.”
Elşad Mirbəşiroğlu vurğulayıb ki, vətəndaşların özlərinin kütləvi şəkildə həmin ərazilərə köçmək üçün müraciət etməsi həyata keçirilən siyasətin uğurunun göstəricisidir.
Aynurə İsmayıl
KONKRET.az
P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə “işğaldan azad olunmuş ərazilərə “Böyük Qayıdış”” mövzusuna uyğun olaraq dərc edilir.
