Türkiyə prezidenti Rəcəb Tayyib Ərdoğan prezident seçkiləri sisteminə dəyişikliklər təklif edir.

KONKRET.az yerli mediaya istinadən xəbər verir ki, Berlindən qayıdan Türkiyə prezidenti Rəcəb Tayyib Ərdoğan ölkənin daxili və xarici siyasi məsələlərinə münasibət bildirib. O, prezident seçkiləri sisteminin dəyişdirilməsinə xüsusi diqqət yetirib.

Ərdoğan seçkidə qalib gəlmək üçün 50+1 faiz səs tələbini tənqid edib. O, prezident seçkilərində qalib gəlmək üçün mövcud səslərin 50 faizindən çox olması tələbinin ləğvini təklif edərək, ən çox səs toplayan namizədin qalib gəldiyi sistemə keçidin seçki prosesini sadələşdirəcəyini və sürətləndirəcəyini bildirib. Onun sözlərinə görə, mövcud tələb siyasi partiyaların arzuolunmaz hərəkətlərinə gətirib çıxarır.

“Səslərin əksəriyyətini alan namizədin seçildiyi sistemə keçsək, məntiqli olardı. Onda prezident seçkiləri daha səmərəli olacaq. 50+1-in hazırkı tələbi tərəfləri yanlış addımlar atmağa məcbur edir”, – deyə Türkiyə prezidenti bildirib.

Ərdoğan həmçinin Türkiyənin müasir konstitusiyasında “darbeci zehniyyət”i əks etdirən elementlərin olmasından narahatlığını ifadə edib. O, müasir tələblərə cavab verən, 1980-ci illərdən başlayaraq dünyada baş verən dəyişiklikləri əks etdirən yeni konstitusiyanın yaradılmasının zəruriliyini vurğulayıb.

Natiq Səlim,

KONKRET.az