“Müharibə zamanı ikinci cəbhə açılmır. Bu, istənilən ölkə üçün qaçılmaz məğlubiyyətə səbəb olacaq”.

KONKRET.az xəbər verir ki, bunu erməni nəşri “Hraparak” yazıb. Nəşr bildirir ki, Ermənistanın Baş naziri Nikol Paşinyan ikinci cəbhə açıb.

“Ermənistan taleyüklü bir vəziyyətdədir. Dövlətimizin mövcudluğu məsələsi həll olunur, Qarabağı itiririk, ölkəmizin ərazisində düşmən oturub, minlərlə evsizimiz var. Bu qədər problemi olan ölkənin təhlükəsizliyi məsələsini unudaraq Nikol Paşinyan cinayət təqibinə başlayır.

Yəni ölkə daxilində ikinci cəbhə açıb. Bu, daha təhlükəlidir, çünki ölkə daxildən zəifləyir, parçalanır. Burada düşünməli heç nə yoxdur. Fəlakətlə üz-üzə qalan bir ölkənin daxili qüvvələri daxili imkanlarını birləşdirmək əvəzinə parçalanaraq, təslim olub. Düşmən gülləsindən minlərlə oğlanın qanı hələ qurumamış ölkədə ikinci cəbhə açır, bundan artıq düşünüləsi heç nə yoxdur.

Ölkə xarabalığa doğru gedir. Artıq bəllidir ki, 2018-ci ildən bu günə qədər məhkəmə islahatları adı altında həyata keçirilən bütün bu pis transformasiyalar bir məqsəd güdürdü – ölkəni daxildən sındırmaq. Siz isə hələ də təəccüblənirsiniz ki, insanlar öz ərazilərinin düşmənə təslim olmasını səssizcə müşahidə edirlər. Danışmağa cəsarət edənlər öldürülür.

İddialar, tapşırıqlar və hər cür sövdələşmələr üçün siyasi saplarla toxunan ikinci cəbhə xarici düşmənin qüvvələrini səfərbər etmək üçün nəzərdə tutulub. Bütün dünya bizi dəstəkləmək üçün ayağa qalxsa belə, çökmə və çürümə daxildən gəlsə, bizə heç nə kömək etməyəcək”, – deyə qəzet yazıb.

Xuraman Etibarlı,

KONKRET.az