Texnologiya nəhəngi “Apple” son üç ticarət günü ərzində təxminən 640 milyard dollar bazar dəyəri itirib. Bu, şirkətin tarixində ən dramatik düşüşlərdən biri kimi qiymətləndirilir.
KONKRET.az milli.az-a istinadən xəbər verir ki, analitiklər bu enişin əsas səbəbi kimi ABŞ və Çin arasında gərginləşən ticarət müharibəsini göstərirlər.
“Apple” Çindən yüksək dərəcədə asılı olduğu üçün, 54%-ə çatan tariflər şirkəti texnologiya sektorunda ən çox zərbə alanlardan biri olub. Cümə günündən bəri şirkətin səhmləri 19%-ə qədər dəyər itirib. Bu da bazar dəyərində təxminən 638 milyard dollarlıq azalma deməkdir.
Bazar ertəsi günü “Apple”ın səhmləri 3,7% daha ucuzlaşaraq, investorların narahatlığını bir qədər də artırıb. Tramp administrasiyasının tətbiq etdiyi yeni ticarət qaydaları xüsusilə texnologiya nəhənglərinə qarşı sərt mövqe ilə seçilir.
Hərçənd ki, bazarda digər texnologiya nəhəngləri – “Microsoft” və “Tesla” da eniş yaşayıb, ən böyük itki “Apple”a məxsus olub.
“iPhone” Qiymətləri Arta Bilər
UBS analitiklərinin hesablamalarına görə, Apple-ın yüksək səviyyəli iPhone modellərinin qiyməti mövcud 1199 dollardan təxminən 30% artaraq 1549 dollara qədər yüksələ bilər. Bu isə istifadəçilərin cibinə ciddi şəkildə təsir edə bilər.
Apple iki seçim qarşısındadır: ya qiymətləri artıracaq, ya da əlavə tarif xərclərini özü qarşılayacaq.
Apple bu məsələ ilə bağlı hələlik rəsmi şərh verməyib.