İranda ali dini lider Əli Xamenei ilə vida mərasimi davam edir. Mərasim Tehranda başlayıb, daha sonra Qum şəhərində davam edəcək və yekunda Məşhəddə dəfn mərasimi ilə başa çatacaq. Mərasimdə çoxsaylı dövlət və hökumət nümayəndələri, parlament sədrləri və rəsmi heyətlər iştirak edir.

“Yeni Sabah” Musavat.com-a istinadla xəbər verir ki, vida mərasimi ilə bağlı dünya mediasında diqqət çəkən bir məqam müzakirə olunur. Bildirilir ki, müxtəlif ölkələrin nümayəndə heyətləri mərasim zalına daxil olarkən İran tərəfi seçilmiş Quran ayələrini tilavət edir.

İddialara görə, Azərbaycan nümayəndə heyəti zala daxil olduğu zaman Ali-İmran surəsinin 139-cu ayəsi səsləndirilib:

“Acizlik göstərməyin, kədərlənməyin. Əgər möminsinizsə, siz üstün gələcəksiniz”.

Bu məqam siyasi müşahidəçilərin də diqqətini çəkib.

Siyasi analitik Nazim Cəfərsoy bununla bağlı paylaşımında qeyd edir ki, ayənin məhz Azərbaycan nümayəndə heyətinin mərasimdə olduğu anda oxunması təsadüfi olmaya bilər və simvolik siyasi mesaj kimi dəyərləndirilə bilər.

Onun fikrincə, İran Azərbaycanın İsrail və Qərb ölkələri ilə əməkdaşlığını regionun geosiyasi balansına təsir edən amil kimi qiymətləndirir. Analitik hesab edir ki, ayənin seçimi Bakıya regional proseslərdə ehtiyatlı davranmaq, yeni geosiyasi reallıqları nəzərə almaq və strateji qərarlarda diqqətli olmaq barədə mesaj kimi şərh oluna bilər.

Qeyd edək ki, bu yanaşma Nazim Cəfərsoyun şəxsi siyasi təhlilidir. İran rəsmiləri tərəfindən Azərbaycan nümayəndə heyəti üçün xüsusi mesaj verilməsi ilə bağlı rəsmi açıqlama yayılmayıb.