İslam Partiyasının həbs edilən sədr əvəzinin məhkəməsi oldu – Vətənə xəyanət ittihamıbackend

İslam Partiyasının həbs edilən sədr əvəzinin məhkəməsi oldu - Vətənə xəyanət ittihamı

Dövlət Təhlükəsizlik Xidmətinin saxladığı Azərbaycan İslam Partiyasının sədr əvəzi, ilahiyyatçı Hacı İlham Əliyev hakim qarşısına çıxarılıb.

KONKRET.az xəbər verir ki, İlham Əliyev və onunla birlikdə həbs edilən Mehman Rzayevin cinayət işi üzrə məhkəmə araşdırması Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilir.

Məhkəmə iclasında məlum olub ki, iş üzrə tanınmış 34 nəfər şahiddən 24 nəfəri dindirilib.

Prosesdə vəkil Cavad Cavadov ittihamda göstərilən “islamınsəsi” və “faktxəbər” saytlarının fəaliyyəti və orada yazılan yazılarla bağlı məsələyə münasibət bildirib. Vəkil deyib ki, həmin saytlarda dövlət əleyhinə yazılar dərc edilsəydi, Nəqliyyat, Rabitə və Yüksək Texnologiyalar Nazirliyinin müvafiq şöbəsi tərəfindən saytlar blok edilməli idi.

Vəkil nazirliyə bununla bağlı göndərdiyi sorğunun cavabını məhkəməyə təqdim edib. Məhkəmə həmin sənədi cinayət işi materiallarına əlavə edib.

Məlum olub ki, iş üzrə dindirilən şahidlərin əsas hissəsi Azərbaycan İslam Partiyasının ayrı-ayrı rayon təşkilatlarının üzvləri və rəhbərləri olub. Onlar partiyaya ayrılan maliyyə vəsaitləri ilə bağlı dindiriliblər.

Təqsirləndirilən şəxslər isə özlərini təqsirli bilmirlər.

Qeyd edək ki, İlham Əliyev ötən ilin fevral ayında saxlanılıb. Ona qarşı Cinayət Məcəlləsinin 274-cü (Vətənə xəyanət) maddəsi ilə ittiham irəli sürülüb. Mehman Rzayev də eyni maddə ilə ittiham olunur.

Məlumat üçün bildirək ki, Azərbaycan İslam Partiyası 1991-ci ildə Nardaran qəsəbəsində təsis edilib. Partiya dövlət qeydiyyatından 1992-ci il sentyabrın 20-də keçib. 1995-ci ildə partiya sədri Hacı Əlikram İrana casusluqda ittiham olunaraq həbs edilib və partiyanın dövlət qeydiyyatı da Azərbaycan Respublikası Ali Məhkəməsi tərəfindən ləğv edilib.

Daha sonra partiyanın sədri olan Mövsüm Səmədov 2011-ci ildə bir neçə tərəfdarı ilə qanunsuz silah saxlamaq, hakimiyyətin ələ keçirilməsi və s. ittihamlarla müxtəlif müddətə həbs olunublar. Mövsüm Səmədov 12 il həbs cəzası alıb.

Həmin zamandan Mövsüm Səmədovun birinci müavini olan İlham Əliyev partiyanın sədr əvəzi vəzifəsini icra etməyə başlayıb. Musavat.com

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*