“Rusiya prezidenti Vladimir Putin onu internet məhdudiyyətlərini sərtləşdirməkdən çəkindirməyə çalışan siyasi elitanın üzvlərinə güzəştə getməkdən imtina edib”.

KONKRET.az xəbər verir ki, bu barədə “The Guardian” qəzeti məlumat yayıb. Nəşrin məlumatına görə, prezidentin mətbuat katibi Dmitri Peskov və onun birinci müavini, daxili siyasət koordinatoru Sergey Kiriyenko şəxsi söhbətlər zamanı FSB-nin ikinci xidməti tərəfindən təşviq edilən internet məhdudiyyətlərinin yumşaldılmasına nail olmağa çalışıblar. Lakin bu cəhdlər uğursuz olub. Mənbələrdən biri bildirib ki, “Müharibə davam etdiyi müddətcə Putin təhlükəsizliyə üstünlük verəcək”.

“The Guardian” qəzeti yazır ki, bir il əvvəl Rusiya bölgələrində başlayan və Telegram-ın bloklanması ilə birlikdə Moskvaya da çatan internetin bağlanması dalğası Moskva elitası üçün qara yumorun daha bir mövzusuna çevrilib. Kremldəki mənbələrdən biri deyir: “Yeməkxanalarda əsas söhbət mövzusu internetdir. Biz tədricən Şimali Koreyaya yaxınlaşırıq”. Qəzet qeyd edir ki, bir vaxtlar Rusiyada gülünc vəziyyətə salınan Çin internet senzurası indi paxıllıq doğurur.

Bu internet məhdudiyyətləri səbəbindən Putinin reytinqi 2018-ci ildən bəri ən aşağı nöqtəyə çatıb. Bundan əlavə, bu, son 8 ildə hakimiyyətə qarşı ən güclü narazılıq dalğasını artırıb və daxili və xarici siyasətdən tutmuş iqtisadi və sosial sahələrə qədər hər şeyi əhatə edib.

Buna cavab olaraq Kreml Putinin reytinqlərinin hesablanması metodologiyasını dəyişdirdi və onlar yenidən “artmağa” başladı.

Qeyd edək ki, internet blokadaları FSB tərəfindən həyata keçirilir, lakin Rusiya rejimi əsasən müharibədən əvvəlki görünüşünü qoruyub saxlayır: büdcəsinin asılı olduğu kifayət qədər nüfuzlu texnokratlar və iri korporasiyalar hələ də mövcuddur. Buna görə də, geniş yayılmış rəqəmsal nəzarət onların razılığı olmadan və iradələrinə zidd olaraq həyata keçirilir.

Natiq Səlim,

KONKRET.az