Rusiya Almaniyada keçiriləcək xokkey yarışlarına buraxılmayacağı təqdirdə dəymiş ziyana görə kompensasiya tələb etmək niyyətindədir.
KONKRET.az xəbər verir ki, bu barədə Rusiya Xokkey Federasiyasının prezidenti Vladislav Tretyak məlumat verib.
Onun sözlərinə görə, məsələ ilə bağlı artıq Beynəlxalq Xokkey Federasiyasının (IIHF) Etika Komissiyasına müraciət olunub.
“Əgər Kanada və Almaniya Rusiya yığmasının yarışlarda iştirakına icazə verməsələr, biz kompensasiya tələb edəcəyik, turnirin başqa yerə köçürülməsinə nail olmağa çalışacaq və təşkilatçılara qarşı sanksiyaların tətbiqini tələb edəcəyik”, – deyə TASS agentliyi SSRİ yığmasının sabiq qapıçısı Vladislav Tretyakdan sitat gətirib.
Məsələyə Rusiya prezidenti Vladimir Putin də münasibət bildirib. O, Rusiyanın idman hüququ mexanizmlərindən istifadə etməklə ölkə idmançılarının beynəlxalq yarışlara qayıtmasına nail olmaq niyyətində olduğunu bəyan edib.
“Biz bu hüquqi yolla ardıcıl şəkildə irəliləməli, qəbul edilmiş qərarları, o cümlədən İdman Arbitraj Məhkəməsinin qərarlarını müdafiə etməliyik”, – deyə Putin bildirib.
Qeyd edək ki, İdman Arbitraj Məhkəməsi oktyabrın sonunda Rusiya xokkey yığmasının yarışlarda iştirakına icazə verilməsi barədə qərar qəbul edib. Bununla belə, Almaniya hökuməti Rusiya komandasının iştirakı ilə dünya çempionatının keçirilməsini “faktiki olaraq mümkünsüz” hesab etdiyini açıqlayıb.
Məlumata görə, turnirdə iştirak edəcək milli komandaların yarısı Rusiya yığmasına qarşı meydana çıxmaqdan imtina edib. İlin sonunda gənclər arasında dünya çempionatına ev sahibliyi edəcək Kanadada isə artıq Rusiya yığmasının üzvlərinə viza verilməyəcəyi bildirilib. Bu qərar faktiki olaraq rusiyalı idmançıların ölkəyə girişini mümkünsüz edir.
Məsələ ilə bağlı Almaniya Xokkey İttifaqı (DEB) da Beynəlxalq Xokkey Federasiyasına müraciət edərək problemin mümkün qədər tez həllini istəyib.
DEB-in rəhbəri Frank Lutz bildirib ki, qərarın bir gecədə qəbul edilə bilməyəcəyini başa düşürlər, lakin məsələnin daha bir neçə həftə uzadılması qəbuledilməzdir.
Onun sözlərinə görə, ev sahibi ölkə üçün Rusiyanın federasiyadakı üzvlüyünün bərpası və bunun dünya çempionatına mümkün təsirləri ciddi iqtisadi risk yaradır.
Beləliklə, Rusiya tərəfi idman hüququ vasitəsilə beynəlxalq yarışlara qayıtmağa çalışsa da, Almaniya və Kanada mövqeləri, eləcə də digər milli komandaların etirazları bu prosesin qarşısında ciddi maneə olaraq qalır.
Ağagül Mürsəlov,
KONKRET.az