SOCAR-ın yeni vitse-prezidenti kollektivə təqdim olundubackend

SOCAR-ın yeni vitse-prezidenti kollektivə təqdim olundu

Dekabrın 3-də “SOCAR-Tower”də Neftin, qazın nəqli və neft təsərrüfatı üzrə vitse-prezident Rəhman Qurbanovun təqaüdə yola salınması və Daşqın İsgəndərovun yeni vitse-prezident vəzifəsinə təyin olunması ilə bağlı mərasim keçirilib.

KONKRET.AZ xəbər verir ki, SOCAR-dan verilən məlumata görə, SOCAR-ın prezidenti Rövnəq Abdullayev bildirib ki, R. Qurbanov Azərbaycan Respublikasının Prezidentinin fərdi təqaüdünə layiq görülüb və bu uzun illər neft sənayesində çalışmış təcrübəli neftçinin əməyinin yüksək qiymətləndirilməsindən xəbər verir. R. Qurbanovla birgə çalışdığı illərdə onu daim öz sənətinə sadiq bir mühəndis, son dərəcə məsuliyyətli bir rəhbər işçi kimi tanıdığını qeyd edən SOCAR prezidenti bütün neftçilər ailəsi adından ona dərin təşəkkürünü bildirmiş və gələcək həyatında uğurlar arzulayıb. Sonra SOCAR prezidenti yeni təyin olunmuş vitse-prezident Daşqın İsgəndərovu kollektivə təqdim edib.

Abdullayev SOCAR-ın qarşısında yaxın perspektivdə duran yeni vəzifələr, maliyyə və əməliyyat dayanıqlığının təmin edilməsi zərurətindən bəhs edib, TANAP kimi uğurlu layihənin reallaşmasında əldə edilən müvəffəqiyyətlərin davamlı olması üçün bütün güc və resursların səfərbər olunmasının zərurətini vurğulayıb.
Qurbanov çıxış edərək, Azərbaycan Respublikasının Prezidenti İlham Əliyevə onun əməyinə verdiyi yüksək dəyərə görə minnətdarlığını bildirib. O, eyni zamanda SOCAR rəhbərliyinə və yeni təyin olunmuş vitse-prezident D. İsgəndərova işlərində nailiyyətlər arzulayıb.

Qeyd edək ki, D. İsgəndərov ali təhsilini başa vurduqdan sonra “28 may” NQÇİ-də əmək fəaliyyətinə başlayıb, 1999-2007-ci illərdə Azərbaycan Beynəlxalq Əməliyyat Şirkəti və “BP Eksploreyşn LTD” şirkətində texniki istehsalat üzrə supervayzer vəzifəsində işləyib. 2007-ci ildə “28 May” NQÇİ-nin rəisinin birinci müavini, 2008-ci ildən “Azneft” İB-nin Baş mühəndisi – baş direktorun birinci müavini, 2011-ci ildən İstehsalat Birliyinin Baş direktoru vəzifələrində çalışıb.

Bir cavab yazın