İranın xarici işlər naziri Hüseyn Əmir Abdullahiyan Tehran və Vaşinqtonun məhbusların mübadiləsi ilə bağlı ilkin razılığa gəldiyini açıqlayıb.

KONKRET.az xəbər verir ki, o qeyd edib ki, heç bir maneə olmasa, mübadilə yaxın bir neçə gün ərzində baş tutacaq.

İran hakimiyyəti davamlı olaraq bu məsələnin nüvə sazişindən ayrı nəzərdən keçirilməsini israr edir. 2021-ci il yanvarın sonunda ABŞ-ın İran üzrə xüsusi nümayəndəsi Robert Malle Reuters-ə müsahibəsində deyib ki, İran tərəfi dörd Amerika vətəndaşını azad etməsə, Vaşinqton çətin ki, Tehranla nüvə sazişinin bərpasına dair saziş bağlasın: Emad Shargi, Morad Tahbaz, Baker Namaz və onun oğlu Siamak. Sonra məlum olub ki, Beyker Namazi Omanın dəstəyi ilə İran həbsxanasından azad edilib və ABŞ-a qayıdıb.

İranın məhkəmə sistemi rəhbərinin beynəlxalq məsələlər üzrə müavini Əli Baqirinin sözlərinə görə, ABŞ hakimiyyəti ABŞ sanksiyalarından yayınmağa cəhddə ittiham olunan 15-ə yaxın İran vətəndaşını həbs edib.