ABŞ ilə Səudiyyə Ərəbistanı arasında dinc nüvə enerjisi sahəsində imzalanan əməkdaşlıq sazişi Yaxın Şərqdə yeni geosiyasi müzakirələrə səbəb olub.

KONKRET.az xəbər verir ki, rəsmi olaraq sənəd mülki nüvə energetikasının inkişafını nəzərdə tutsa da, ekspertlər hesab edirlər ki, gələcəkdə Ər-Riyada tam nüvə yanacağı dövriyyəsi yaratmaq imkanı verə bilər.

Sazişdən sonra Vaşinqton bəyan edib ki, onun icrası Səudiyyə Ərəbistanı ilə İsrail arasında münasibətlərin normallaşmasından asılı olacaq. Buna baxmayaraq, İsrail razılaşmanın gələcəkdə uranın zənginləşdirilməsi texnologiyalarına çıxış üçün presedent yarada biləcəyindən narahatdır.

ABŞ Prezidenti Donald Tramp isə Səudiyyə Ərəbistanının uranı müstəqil şəkildə zənginləşdirməyəcəyini bildirib. Bununla belə, analitiklər hesab edirlər ki, Vaşinqton bu məsələni həm siyasi təsir vasitəsi, həm də regionda strateji balansın qorunması üçün istifadə edə bilər.

Mütəxəssislərin fikrincə, əgər gələcəkdə Ər-Riyad uranın zənginləşdirilməsi texnologiyalarına sahib olarsa, bu, Yaxın Şərqdə digər dövlətlərin də oxşar imkanlar əldə etmək istəyini gücləndirə və regionda təhlükəsizlik balansını dəyişdirə bilər.

Müşviq Tofiqoğlu
KONKRET.az