ABŞ-ın Xəstəliklərə Nəzarət və Qarşısının Alınması Mərkəzləri (CDC) agentliyi dərmana davamlı “Candida Auris” adlı göbələk xəstəliyinin səhiyyə müəssisələrində yayıldığı barədə xəbərdarlıq edib.
KONKRET.az xarici mediaya istinadən xəbər verir ki, agentlik yoluxmuş insanların təxminən 30% -dən 60% -ə qədərinin öldüyünü açıqlayıb. Lakin bu statistik rəqəmlərin məhdud sayda xəstələrin məlumatlarına əsaslandığını diqqətə çatdırıb. 2022-ci ildə yoluxmaların sayında ciddi artım olduğuna diqqət çəkən “CDC”, sağlamlıq mərkəzlərində ümumi infeksiyaya qarşı nəzarət təcrübələrinin zəif olması səbəbindən xəstəliyin sürətlə yayıldığını açıqlayıb.
Qeyd edək ki, ABŞ-da göbələk xəstəliyi ilə bağlı xəbərdarlığın məşhur “The Last Of Us” serialı ilə bağlı olduğu haqda fikirlər dolaşır.. Belə ki, “The Last of Us” qaçaqmalçı Coel və 14 yaşlı Ellinin bütün bəşəriyyəti məhv edən epidemiyada sağ qalmaq üçün apardığı mübarizədən bəhs edir. “The Last of Us” filmində söhbət xalq arasında “zombi göbələkləri” kimi tanınan əsl parazitlər qrupundan gedir.
Həkimlərin sözlərinə görə, “Cauris” kimi də tanınan “Candida auris” qan dövranında, ürəkdə və beyində ölümcül infeksiyalara səbəb ola bilər. Mütəxəssislər ölümcül potensialına baxmayaraq, xəstəxanalarda müvafiq dezinfeksiyaedici tədbirlər görməklə “Candida” virusunun yayılmasının qarşısının alına biləcəyini açıqlayırlar. Xəstəlik təmas yolu ilə yayıldığı üçün mümkün bir epidemiyaya qarşı güclü infeksiya nəzarət planına ehtiyac olduğunu vurğulayırlar.
“Vanderbilt” Universitetinin yoluxucu xəstəliklər kafedrasının professoru William Schaffnerin sözlərinə görə, göbələklər xəstəxanaya daxil olduqda onları idarə etmək və təmizləmək olduqca çətinləşir.
Müşviq Tofiqoğlu,
KONKRET.az