Kreml Bakıdakı “Rus Evi”nin (“Rossotrudniçestvo”nun Azərbaycandakı nümayəndəliyi) bağlanmasını anlaşılmazlıq adlandırıb.

KONKRET.az TASS-a istinadən  xəbər verir ki, bunu Rusiya prezidentinin mətbuat katibi Dmitri Peskov baş verən hadisələri jurnalistlərə şərh edərkən deyib.

“Biz buna təəssüf edirik. Hesab edirik ki, bu, həll edilə bilən anlaşılmazlıqdır”, – deyə o, qeyd edib.

Xatırladaq ki, Azərbaycan fevralın 3-də Bakıdakı “Rus Evi”nin fəaliyyətinin dayandırılması ilə bağlı Rusiya tərəfinə rəsmi nota göndərib.

Bunu Azərbaycan Respublikası Xarici İşlər Nazirliyinin mətbuat xidmətinin rəhbəri Ayxan Hacızadə açıqlamasında deyib.

Onun sözlərinə görə, Rusiya Evinin bağlanması qərarını nəzərə alaraq, Bakı Moskvanın müvafiq tədbirlər görəcəyini gözləyir.

Diplomatik qurumun nümayəndəsi qeyd edib ki, USAİD və ya Rus Evi kimi təşkilatların Azərbaycan ərazisində fəaliyyəti milli qanunvericiliyə uyğun olaraq tənzimlənməlidir.

Günel Mikayılova,

KONKRET.az