Spiker Sahibə Qafarovanın sədrliyi ilə Milli Məclisin növbədənkənar iclasında bir sıra millət vəkilləri yenidən Azərbaycan cəmiyyətini ən çox narahat edən məsələlərdən birini qaldırıblar. Söhbət bir sıra məmurların özbaşınalığından, vətəndaşların maraqlarına və ehtiyaclarına məsuliyyətsiz və laqeyd münasibətlərindən gedir.

KONKRET.az xəbər verir ki, parlamentin mədəniyyət komitəsinin sədri Qənirə Paşayeva vətəndaşların bəzi məmurlar ilə görüş ala bilməməsi məsələsini qaldırıb. Bu səbəbdən millət vəkili “strukturlardan cavab ala bilmədikləri və onların adından danışmağımı istədikləri üçün mənə müraciət edirlər” deyə vurğulayıb.

Buna nümunə olaraq Q.Paşayeva bir şəhid atasının ona müraciətini göstərib. Müvafiq məhkəmə qərarı olsa da, bu vətəndaş ölən oğlu üçün sığorta ödənişləri ala bilmir. “Dövlət orqanlarına əli çatmadığı üçün mənə müraciət edib” deyib millət vəkili.

Bürokratik məsuliyyətsizlik probleminə toxunan Q.Paşayeva millət vəkillərinin rəsmi sorğularına ümumiyyətlə cavab vermək məcburiyyətində olduqlarını vurğulayıb. O, hiddətlə qeyd edib: “Bəzi rəsmilər bu mövzunu üçüncü dəfə Milli Məclisdə qaldırdığımı və dördüncü dəfə qaldırılmamalı olduğunu söyləyirlər. Bu nə tondur, nə danışıq tərzidir? Məmur kimdir ki, millət vəkilinə hansı mövzuları qaldıracağını söyləsin? Dördüncü dəfə eyni məsələni qaldırıramsa, deməli problem həll olunmayıb”.

Çıxışına yekun vuran Q.Paşayeva məmurların işə münasibətlərinə yenidən baxmayacaqları təqdirdə adlarını açıqlayacağına söz verib.

Xuraman Etibarlı

KONKRET.az