Hər iki “Şimal axını” həmişəlik məhv edilib.
KONKRET.az xəbər verir ki, bu barədə “Der Tagesspiegel” qəzeti məlumat yayıb. Almaniyada hər iki “Şimal axını”nın təxribatdan sonra əbədi olaraq məhv edildiyi güman edilir.
“Almaniya təhlükəsizlik xidmətləri “Şimal axını 1” və “Şimal axını 2” qaz kəmərlərinin üç borusunun əbədi olaraq istifadəyə yararsız olacağını güman edir. Əgər onlar tez bir zamanda təmir edilməsə, boru kəmərinə çoxlu duzlu su daxil olacaq ki, bu da korroziyaya səbəb olacaq”, – deyə qəzet hökumətdəki mənbələrə istinadən yazır.
Hazırda kəmərlə bağlı Qərbin versiyalarından biri də Rusiya hakimiyyətinin təxribatıdır. Kreml bu açıqlamaya reaksiya verib və bunu axmaqlıq adlandırıb.
Bundan əvvəl “Şimal axını 2”də hər iki yivdə təzyiq kəskin şəkildə aşağı düşüb, qaz kəmərində fiziki zədə aşkar edilib.
Hər iki kəmərin üç qolunun məqsədyönlü partlayışlardan ziyan gördüyü güman edilir. Çünki dəliklərin ölçüsü çox böyükdür və boru kəmərlərində təzyiqin düşmə sürəti də yüksəkdir. Buna görə də, bir versiyaya görə, dalğıclar partlayıcı maddələri “Şimal axını 1”in iki və “Şimal axını 2”nin bir borusuna quraşdırıblar. Bundan əlavə, sızmanın baş verdiyi üç yer arasında əhəmiyyətli bir məsafə var.
Hadisə Almaniya Xarici İşlər Nazirliyinin böhran qərargahı tərəfindən öyrənilir, bir sıra federal nazirliklər və federal kanslerin departamenti hadisənin nəticələri ilə bağlı məsləhətləşmələr aparır.
Qeyd edək ki, Rusiyanın Ukraynada “xüsusi əməliyyat” elan etməsindən sonra ABŞ və Qərb ölkələri ciddi enerji böhranı ilə üzləşib.
Xuraman Etibarlı,
KONKRET.az